دكتور مصطفى محمود

الله هو المحبوب وحده على وجه الأصالة وما نحب فى الآخرين إلا تجلياته وأنواره فجمال الوجوه من نوره وحنان القلوب من حنانه فنحن لا نملك من أنفسنا شيئاً إلا بقدر ما يخلع علينا سيدنا ومولانا من أنواره وأسمائه

Monday, November 10, 2008

البنت ومحطة مصر والترام

انهاردة هاحكى عن واحدة انا بجد استغربتها

احكى الحكاية ونشوف هنحكم عليها بأية فى الاخر


كانت رايحة لاكتر مكان فى اسكندرية فية زحمة كانت رايحة محطة مصر ولانها مش بتحب الزحمة كانت مضايقة جدا


عشان رايحة عند الزحمة لكن كانت وحشها الترام الصفرا وكشرى المدهش ومحطة مصر والجنينة اللى قضت فيه اجمل اوقات


المهم انها راحت هناك وفعلا ركبت الترام وكانت مستمتعة جدا بالجو بالرغم من الزحمة اصلها لو مكنتش زحمة متبقاش ليها طعم محطة مصر


ومشغلة الام بى سرى وعينها مش ملحقة نظرات على الاماكن والمحلات وعمالة تفتكر ذكرياتها الجميلة مع الاماكن دى


انا عارفة انها هتكون كدة لما تروح هناك ومش هطول عليكو فى احسسها كان ازاى يومها


لكن فى ظل الاحداث الجميلة اللى هيا بتعشها والذكريات الحلوة اللى كانت بتفتكرها


حدث ما افاقها على ضربات قلب سريعة واعصاب منفلتة ودموع بالعين لا تتمالك فى ايقافها


الترام اللى كانت راكبة فية خبط طفل صغير ومع فرملة الترام توقفت معاها كل هذة المشاعر والاحاسيس

ونزلت مسرعة من الترام لتحاول ان ترى ما حدث


بتبص على الترام من الناحية دى مش شايفة حاجة

تجرى بسرعة تبص من الناحية التانية وتجد الطفل البرىْ تحت الترام وقد قطعت يدة وانفصلت عن بعضها


منظر مش قادرة اقول او اشرح ازاى وقد اية كان صعب


مع صراخ وبكاء الطفل تفلتت كل اعصابها ولكنها تملكتها للحظات

توجهت مسرعة نحو الطفل لتحاول ان تساعدة
لكن الترام لما فرمل كان فرمل على ايد الطفل وايدة تحت الترام
طلبنا السائق بأن يرجع الى الوراء حتى تتمكن من جذب يد الطفل وبالفعل اخرجنا الطفل من تحت الترام
وهيا ممسكة بيدة وتضع يد الطفل على صدرة ومسح على رأسة لتطمئنة وتهمس فى أذنة متخافش يا حبيبى انت كويس دلوقتى ومتعيطش الرجالة مش بيعيطوا صح ولا اية
ولكن لا يستجيب الولد اللى ما قالتة وهو فى حالة صدمة شديدة
تقف مسرعة لتطلب الاسعاف ...مشغول....مشغول...مشغول...نفذ صبرها...تحاول اخر مرة يجيب الهاتف ويقول الرجل اسعاف
قالت ايوة فى حدثة هنا
الهاتف ...تيت ...تيت...تيت
الرجل اغلق الخط ...تفكر ماذا تفعل وترجع الى الطفل وتقعد بجانبة
ثم يقطعوا شنطة المدرسة من على ظهر الطفل
ويجدوا رقم موبايل فى كتاب الطفل وتأخذ الرقم وتتصل بالرقم يجيب شخص وكان والدة حاولت ان تبلغة الامر ببساطة وفعلا
جاء الرجل الى مكان الحادث ويبكى ويصرخ اسفا على ابنة وعلى حالة
وهى تقف بعيدا وتشاهد المنظر من بعيد وهى فى غاية القلق على الطفل
ومن سيارة الاسعاف التى لم تأتى بعد
تحاول مرة اخرى وتتصل بالاسعاف ويجيب الهاتف وتبلغهم عنالحادث فاتقول هى فى الطريق يا فندم
شكرا
بالفعل وصلت الاسعاف واخذت الطفل الى المستشفى
وهى الان نفسها ان تطمئن على الولد ولكن ماذا تفعل؟
فى وسط الزحام من البشر والقلق على اوجة الرجال وبكاء النساء وشهامة الشباب

ظهر ذلك الولد الذى نعرفة جميعا... الكتلة فى البرود...الردود العنيفة....اللامبالاة...الهزار السخيف

ويقول ما الولد كويس اهو دة الترام عدا على ايدة بس يعنى هو موتة

أظن لو كان ابو الولد حاضر وسمع هذا الولد متهيألى كان حاطة تحت الترام بدلا من ابنة

وتذهب هذة البنت والمنظر لا يختفى من امام عيناها وتصل الى مكان الركوب حتى تذهب الى بيتها

وهى فى حالة لا وعى لا تدرك ماذا تركب وماذا تفعل وماذا حدث للولد واسئلة كثيرة تشغل بالها

ثم تبدأ تستعيد وعيها بعد دقائق من اللاوعى وتبحث عن مكان لتغسل بية يدها من الدم

وبالفعل تركب المينى باص وترجع الى البيت

بالنسبة لموضوع انى عايزة احكم عليها

لان فى ناس قالت دى قلبها ميت

وناس قالت دى بنت جدعة وبتعرف تتصرف

وناس قالت دى بتعمل شو

وناس استغربت موقفها

لكن لست ادرى لما كانت هيا اول واحدة تنزل من الترام وتقف بجانب الطفل وتحاول ان تساعدة

لما كانت هيا البنت الوحيدة فى وسط الجمع الغفير من الرجال والشباب

لما كانت تحاول تطمئن الطفل وتخفف عنة الالام

يمكن عشان حست انها مسئولة عن مساعدة الطفل

يمكن ان الاوان لترد الجميل الذى حدث فى والداها

يمكن عشان لما والداها حصلتلة حادثة من شهور قليلة لم ينجدة غير الناس وشافت بعنيها حب الناس وخوف الناس على والداها

يمكن

يمكن

ممكن

..........................................................................


Tuesday, October 21, 2008

ثلاث سنوات لمد الايد






فى واقعة تحرش جنسى حدثت فى احدى شوارع القاهرة حيث ان الجانى كان يمر بالسيارة النصف نقل بجوار المجنى عليها واخرج يدة
من شباك السيارة وتحرش بها ثم نظر الى المجنى عليها وضحك وفر بالسيارة ومن ثم قامت الفتاة بالجرى وراء السيارة حتى استطاعت ان
تقفز فوق العربة فى الصندوق الخلفى واخذت تحاول معة لايقاف العربة وبالفعل اوقف الجانى العربة



ونزل منها واخذت المجنى عليها الجانى تجرجرة الى قسم الشرطة وقامت بعمل محضر تحرش جنسى لة



وتمت هذة الواقعة فى شهر يونيو من العام الحالى ومن هذا الوقت حتى الان لم يكن قد حكم فى القضية



واليوم الواحد والعشرون من شهر اكتوبر تم الحكم فى القضية وكان الحكم بثلاث سنوات سجن مع الحكم المشدد



وهكذا شهدت محمكة شمال القاهرة اول قضية تحرش جنسى وشهدت مصر اول حكم فى مد الايد



تهانينا لكل بنت مصرية وليست لصاحبة القضية فقط



وليتذكر كل من تسول لة نفسة فى مد يدة ان فى انتظارة من يقوم بمعافبتة



انا بحى القضاء المصرى فى هذا الحكم



وليكون هذا السفية لمن خلفة أية



تهنئة خاصة لصاحبة القضية على شجاعتها وجرائتها فى هذا العمل واهنيكى على فوزك فى هذة القضية



انا شايفة مستقبل مبشر ان شاء الله لانتهاء عصر قلة الادب والتحرشات المستوردة على مجتمعنا






Wednesday, October 15, 2008

احوالنا

بسم الله الرحمن الرحيم

كنت راجعة امبارح من الشغل وطبعا مش هاوصف ازاى المواصلات بتكون زى الزفت واحنا راجعين من الشغل

بجد اصعب وقت تركب فية مواصلات هو وقت انصراف الموظفين وغير كدة بقة تلاقى السواقين تتعوج عليك

يركب الصبح على مزاجة والظهر على مزاجة وبالليل على مزاجة ولو متعوجش عليك فى المكان اللى انت رايحة

تلاقية اتعوج عليك فى الاجرة..مثلا

فى وقت الزحمة تلاقى الاجرة بقت الضعف ولو مش عاجبك انزل

بالليل بعد الساعة 12 بتزيد عشان مش عارفة لية؟

ولو مش عاجبك.. انزل يا حبيبى شوفلك حاجة تانية فى غيرك الف عايزين يركبوا ويدفعوا برضوا

وتحس ان الحياة بقت ماشية بالبلطجة ولوى الدراع ومش حاسة ان فى اوضاع بتصحح

المهم خلينى فى اللى كنت عايزة اقولة ..كنت راجعة امبارح من الشغل وبعدين وانا نازلة من المشروع

لقيت واحدة ست حاجة كبيرة وافقة فى نصف السكتين ومافيش ولا عربية عايزة تخلى عندها شوية دم وتقف لغايط ما الحاجة تعدى

لما عديت ووصلت عندها اخدتها وروحت معديها للرصيف التانى ولسة يا جماعة بلف نفسى وبرجع

لقيت سواق عربية نصف نقل قالى :ماتخفى يخربيت..................... اكيد بقة الباقى واضح

طبعا انا كنت فى نصف السكة ومكلمتش واخدت الكلمة وكملت عادى وروحت وركبت المشروع التانى

لما قعدت مع نفسى سألت نفسى هو لية شتمنى؟ يعنى كل دة عشان اوقف خمس ثوانى؟ ولا هو الدم اتعدم من البشر

طب لو كانت الحاجة دى تبقى والدتة هو.. تفتكروا كان شتمنى باردو وانا بعديها

بصراحة اسفى على احوال المصريين فى انحلالهم الاخلاقى المستورد عليهم

اكيد محتاجين اعادة تأهيل

ولو الحكومة وحشة فانا متأكدة انة مننا وبسببنا ومن اعمالنا ومن انفسنا

مثلما تكونوا يولى عليكم

يا جماعة عشان نبتدى نصلح فى المجتمع لازم نبتدى بين الاول لازم نصلح من انفسنا

لايغير الله ما بقوم حتى يغيروا ما بأنفسهم

اللهم اعنا

ملحوظة اخيرة: حملة صناع الحياة الجديدة هاتبدى بس لازم يكونوا 35 الف مشترك

محتاجين شباب كتير يا جماعة عشان نبتدى الحملة يلا الحاضر يعلم الغايب

وهتلاقى استمارة التسجيل على جروب صناع الحياة على الفيس بوك وعلى موقع الدكتور عمرو خالد

اللهم بلغت

تحياتى

Monday, October 6, 2008

حسنة قليلة تمنع بلاوى كتيرة


توبيك غريب راجعة بية بس انا بحب كل حاجة غريبة عشان كدة متسغربوش من غرابة التوبيك

ازيكو يا جماعة عاملين اية؟ بجد والله انتوا كلكوا وحشتونى بحلوكوا ومروكوا وحشتونى وخلاص

طبعا كل سنة وانتم جميعا طيبين وهيا متأخرة شوية بس انا عارفة ان قلوبكم كبيرة وهتعديها

طبعا بحب اشكر كل اللى سأل عنى ومسألش باردو

اتمنى انى اكون وحشتكوا زى ما انتوا وحشتونى

ومش هطول عليكوا المرة دى وان شاء الله هانزل ببوست قريب

واتمنى ان الاسلوب الجديد فى الشحاتة يكون نال رضاكوا



صنع فى الصين

تحياتى

Tuesday, September 2, 2008

شهر الحبيب








وعاد الينا شهر الحبيب



فاهيا نغتنم الفرصة ونعود بقلوبنا الى النور

.............................



نغفو دائما وننسى دائما ونلهو دائما



لكننا على يقين اننا سنعود وقاد جاءت الفرصة



هيا بنا نغتنمها اخوانى واخواتى



هيا نملآ صحفنا بالحسنات وندعو الله ان يكتبنا من الصائمين



ونكون من الذين يدخلون من باب الريان

ونكون ربانين وليس رمضانين

ويكون شعارنا وعجلت اليك ربى لترضى


ربى لا تحرمنا اجر هذا الشهر وبلغنا اخرة


امين امين امين


وصلى اللهم وسلم على سيدنا محمد وعلى اله وصحبة اجمعين


كل عام وانتم بخير


Sunday, August 17, 2008

مظهر لا يليق بك



السلام عليكم ورحمة الله وبركاتة

بقالى كتير غايبة عن التدوين والمتابعة وطبعا اسفة جدا انى مش متابعة حد خالص بس معلش ظروف بجد كانت جامدة
بس الحمد لله ربنا بيهون الامور المهم ان التدوين وحشنى جدا وكمان المدونات وحشتنى جدا جدا
لكن الموضوع اللى هاكتبة انهاردة لولاة بجد مكنتش هاكتب حاجة خالص دلوقتى انتو عارفين رمضان على الابواب ولازم الواحد يجهز نفسة للشهر العظيم دة
المهم كل سنة وانتوا ومدونتكوا طيبين ودايما يارب للامام فى كل امور الحياة
مش هطول عليكوا لكن باختصار الموضوع هو الثلاث صور اللى فوق دول
كنت ماشية امبارح على البحر انا واهلى ومجموعة ضيوف وبعدين بدور على شط فاضى نقدر نقعد فية بصورة كويسة ونستمتع كمان باليوم
وانا ماشية لقيت واحد من بتوع امن الشواطئ قاعد على البحر وبهزر ومعاة وبقولة
هو مش البحر دة بتاع ربنا
قالى : اة
قلتلة: فى حد يدفع فلوس عشان يدخل بحر ربنا
قالى : اة
قلتلة: ازاى
قالى: عشان صاحب الشط دافع 3 مليون جنية فية
قلتلة: دافعهم لربنا
ضحك وقالى: لا للمحافظة
قلتلة: طيب احنا مالنا
قالى: بصى يابنتى شايفة المكان اللى انا صورتة دة.. الحتة اللى فيها بلاط
قلتلة : ايوة
قالى: دى كانت مصلى كنا بنصلى فيها
وكان فى واحد مهم جدا جدا جدا جدا واخدين بالكو من جدا دى وكنا معاه واحد تانى زائر كان عندنا فى اسكندرية
وبعدين عدى صاحبنا المهم دة من على البحر وشاف المصلى دة والظاهر انة معجبوش على طول أمر بأزالتة
متهيألى كدة انة مكنش مظهرة حضارى فى نظرة يعنى.. فاقال شيلة اتشال طبعا لكن الديسكوهات اللى مليانة البحر من اولة للاخرة
مظهرها حضارى اكيد طالما بتجيب فلوس
وعشان صاحبنا المهم دة كمان كان جاى كنت قبلها فى يوم فى منتجع عند مدخل اسكندرية كدة كانت العملية مقفولة على الاخر ومصفحات امن مركزى نازلة وامن مركزى مرصوص من اول مدخل اسكندرية لغايط محطة مصر وماسك كمان شارع قناة السويس
انا بجد مش عارفة اقولة اية ؟ غير انك هاتعيش وتموت وتفضل فى سجن الحياة
مش هاقول غير .... ولا اقولكوا احنا قولنا كتير
خلية يشيل اما نشوف هايسدد منين فى الاخرة
تحياتى

Saturday, July 5, 2008

تدبر وفكر وتذكر

عجبت لكم

أراكم فى الصلاة تتوجهون بالملايين الى كعبة واحدة فى مكة..فإذا انقضت الصلاة انفرط الجميع وتفرقت بكم الطرق ..فمنكم من كعبتة واشنطن ومنكم من كعبتة باريس ومنكم من كعبتة جنيف ومنكم من كعبتة صندوق النقد الدولى ومنكم من كعبتة نفسة ! فأى نجاح تنتظرون

وكل منكم حرب على الاخر؟

فاصلاة المسلم هى مؤشر لحياتة ولا صلاة لكم وأنتم ممسكون بعضكم بخناق بعض

فاجتمعوا وتحابوا واتحدوا فقد تداعت عليكم الامم كما تداعى الاكلة على قصعتها وأنتم كثير وليس كغثاء السيل الذى انفرط وتفرق بددا

فهل أجتمعتم..قبل أن يأتى عليكم الطوفان؟
أليس فيكم رجل رشيد؟


مقتطفة من كتاب سواح فى دنيا الله للدكتور مصطفى محمود

لنعمل .. ونجتهد.. ولنساعد الضعيف
*ألا ترون أن القيم ضاعت معنا ونحن خلفاء الله فى الارض
*الا ترون أن الامانة ضاعت ونحن من حملنا الامانة بعد أن أبت السموات والارض حملها
*الاترون أننا نهتم بالمظاهر أكثر مما يلزم .. وغالبا المظاهر تخدع الكثيرين
*الا ترون أننا أن قدرنا لانعفو وقد قال الله تعالى: وليعفوا وليصفحوا ألا تحبون أن يغفر الله لكم .النور 22
*ألا ترون أننا أغفلنا عن حق الله فى أنفسنا وأموالنا وعبادتنا ومازال الله جل وعلا يرزقنا ويحيينا وينعم علينا
*سبحانك يارب نتضرع اليك بالمعاصى وتضرع الينا بعفوك وغفرانك
*ألا ترون أننا لانحسن الظن وقد قال الله تعالى أن بعض الظن أثم ومع ذلك لا نقترف ان سوء الظن من الذنوب عند الله
*أرجوكم غيروا من فكركم فأننا دائما مخطئين بحق بعض الناس مثل العصاة من الناس فادائما نكرة العاصى ومن منا لايعصى فى السر والجهر .. هيا بنا نغير ونعدل من تفكيرنا فحاول أن توصل للعاصى انك تكرة المعصية ولا تكرة عاصيها

أقول لنفسى من قبلكم هيا بنا نرجع لمعاملتنا السليمة ..هيا بنا نرجع للامانة ونشجع من حولنا على الامانة .. هيا بنا نحسن الظن بالجميع..هيا بنا نرتفع بقيامنا وعادتنا السليمة

نجعل مبدئنا حسن الظن والامانة والعفو عند المقدرة

وأخيرا أوصيكم ونفسى بأن نتعامل بالتوصية (وتواصو بالحق) نحن الان جميعنا يقول نفسى ثم نفسى ثم نفسى

هيا نغير هذا المبدأ هيا نوصى بعضنا على الحق
فى رأيكم ماذا ينقصنا من القيم والاخلاق حتى نرجع بديننا الى ما كان علية ونرجع نحن ايضا المسلمون وليس الاسلاميون؟
ما هى القيم التى اكتسبها الغرب حتى يكونوا فى هذة المكانة الحالية؟
.........................

Wednesday, July 2, 2008

متى ينتهى؟؟؟

الوقت بالتقريب الساعة الخامسة صباحا
قد حان وقت الشروق ولكن مازال الجو مظلم
ارها فى غرفتها وهى تلبس العباءة بعد صلاة الفجر وتلبس حجابها وتتجة نحو باب الشقة وبيدها المحفظة

تنظر الى وتقول انتى صحيتى يا حبيبتى؟

ايوة يا ماما ..هاصلى الفجر انتى صليتى؟

ايوة الحمد لله

انا: رايحة فين ياماما؟

نازلة اجيب العيش وسبينى لحسن أتأخرت وهاروح مش هلحق

تخرج وتنظر لى بابتسامة جميلة وتجر الباب ثم يغلق


أتوضأوأصلى الفجر ثم ارجع الى سريرى ..الوقت مازال باكرا على ميعاد استيقاظى


أنام ...استيقظ على دعاء الشيخ محمد جبريل الساعة قاربت السابعة والنصف


أستيقظ وانهض من على سريرى... افتح باب غرفتى


ابى يجلس بالصالة...صباح الخير يابابا؟

صباح الخير يا حبيبتى

اذهب لاغسل ما تبقى من أثار النوم...واخرج من الحمام وابحث عنها فى أرجاء الشقة ولا أجدها
اعلم انها لم تأتى حتى الساعة 9 صباحا لم تأتى... وانزل من شقتنا وانا يجول بذهنى تفكير معين
متى ستنتهى هذة المأساة؟؟؟؟؟...........
مواطنة حزينة

Thursday, June 19, 2008

ما تبرطمش كتير...

السلام عليكم ورحمة الله وبركاتة
عن حال أغلبية المصريين أعتنقوا المذهب البرطمى الذى أسسة بطريموس الاول
قبل وفاتة وفية يتحول الكائن البشرى او المواطن والمتواطن والوطن مع الوقت
الى برطمان مغلق؟
بصيت قبل كدة على حالك وحال صاحبك بصيتى على نفسك واسلوبك فى الكلام وعلى صحبتك محستوش اننا بقينا بنبرطم كتير
تفتكروا البرطمة مرض اجتماعى من الضرورى ان يتوارثة الناس من جيل الى جيل حتى يستمر هذا المذهب
عموما اللى خلانى اقول كدة انى مرة كنت راكبة مشروع او ميكروباص وكان فية لجنة وقفت المشروع وفى واحد كان راكب من الواضح انهم اشتبهوا فية او زى ما الناس قالت عايزين يتغدوا شكلهم... اعدوا استفسروا عن حاجات وبعدين شافوا واحد تانى سألوة هو كمان بعض الاسئلة وبعدين شكلهم لقوا الموضوع تمام فاقلة امشى
المهم ان أخينا التانى اللى سألوة كان عامل زى الكتكوت المبلول قدام بتاع اللجنة واول ما المشروع طلع قال بقة: والله لو كان قالى حاجة كنت عملت وعملت وعملت وهو حتة ...بتاع يعنى هايشوف نفسة عليا واخينا الاول يقولوا اهو دة برة خدمتة ولا يسوى حاجة
الظريف بقة فى الموضوع اية؟ انهم بيبرطموا على بعض
لية اعتدنا اننا نبرطم على الفاضى؟
بس ارجع واقول هما كمان هايمنعوا البرطمة عن الناس تبقة خانقة من كلة بقة يمكن فى انسان بيبرطم لانة مش قادر يعمل حاجة غير كدة فى الوقت الحالى
وحين ميسرة بقة
وكما قال شاعر الفرعون::::: دع المبرطم يبرطم ما يشاء
فكل ما قد يبرطمة
هراء..كم برطم المصريون قرونا
فما تغير بالبرطمة قضاء
إنا وضعنا للبرطمة حدودا
تراق فى تجاوزها الدماء
سامح عثمان

Thursday, May 29, 2008

عرض مغرى

عايز تشوف الدنيا خضرة..
يبقى حديقة الازهر..
أو الفسطاط..
عايز تشوف الدنيا حلوة..
وتبقى واد رومانسى..
وتعيش ف الخيال..
عليك بقى وعلى أمانة السياسات..
قرفان لامؤاخذة من رجولتك..
عملية بسيطة وتبقى ست الستات..
نفسك تبقى حر ومش عارف..
اشتم الشاعر اللى بيكتب سلامات..
ياعم الناس لبعضيها..
فية إية..
دة احنا كلنا ف الهم إخوات..
ومتقلقش خالص..
لا فيها تعويض..
ولا تهمة تحريض..
ولا قانون طوارى..
ولا جنايات..
إنما لو كان بجد..
إحساسك مات..
مش هاقدر أعمل حاجة
على سلامة

Sunday, May 18, 2008

التدوين والمدون وجهان لعملة واحدة








حينما ابتدأت فى التدوين لم يكن يحظى بهذا الاهتمام الذى اقوم بية الان حيث ان المدونة وجميع المدونات اصبح اهم عندى من الجريدة المفضلة التى استمتع بقرأتها يوميا او اسبوعيا



حينما بدأت كانت لى بمثابة تجربة او طرق باب جديد يمكن ان اخرج منة بالنفع فى حياتى وبدأت ولم يكن لدى أدنى فكرة ماذا اكتب مثل حال جميع المدونين ولكن ما جعلنى استمد القدرة على الكتابة هم المدونين نفسهم .. أتذكر أن حال الانسان قبل التدوين شى وبعدة شى اخر



حيث ان مدونتة والتعليقات ممكن ان تأخذ كامل تفكيرة وكامل أنشغالة وحينما يمر علية موقف ووجد منة موضوع فعلى للكتابة لايتردد فى كتابتة وخصوصا اذا كان معروف والمدونين ينتظرون منة الجديد دائما



وعندما يضع المدون حالتة فى مقارنة قبل التدوين وبعد التدوين يجد ان رؤيتة للمواقف والحياة اليومية اختلفت تماما عما قبل.. يجد نفسة مرصادا للاحداث المثيرة ولاسيما اذا كان الحدث معة شخصيا ويكون مثير فى حد ذاتة او يكون لة السبق فى اعلان عن شى او رأى شيئا استنكرة واستنكر حدثة تجد المدون سريعا ما وضع النقاط فى ورقة حتى لا تذهب عن عقلة ..حتى اذا وصل الى الكمبيوتر وجد نفسة منهمرا فى الكتابة عن احداث الموقف ويتمنى لو الكمبيوتر معة فى وقت الحدث حتى يكتب كل حرف ولا ينسى شيئا



عجبا..لامر المدونة فهى شغلة الشاغل طول الوقت



وايضا عندما يقارن المدون حالة اذا مر علية هذا الموقف قبل التدوين لم يعطية هذا الاهتمام الواسع مثلما يكون بعد تجربة التدوين



وبعدما كانت الفكرة هى الكتابة عن النفس او الذات او حتى اشعار اصبحت المدونة حياة الانسان اليومية واصبحت ايضا اكثر وضوحا عند بعض الناس وحتى لو لم يكونوا مدونين فالمدونات الان لها شعبية جماهيرية عريقة ليست بقلة وكثيرا ما نجد ان من المتابعين للمدونة مجهول او شخص فتح صفحة بلوج ولم يفتح صفحة للتدوين وغيرهم.. فاهتمام معظم الناس الان عندما يدخلون على الانترنت تحول الى المدونات واخر مواضيع طرحها عملاقة التدوين وشغلهم الشاغل ايضا مؤخرا هو موقع الفيس بوك حيث انه ايضا له قاعدة عريقة من المتابعين وخصوصا بعد ارتباط الموقع بالمدونين والمدونات فهم الان جزء لايتجزأ من بعض عند معظم المدونين والمتابعين



ولكن .. جلست افكر كثيرا فيما هو مخيف بالنسبة الى المدون الجديد بماذا يفكر؟ عندما يجد اول تعليق عندة وخصوصا اذا كان التعليق من نجم نجوم المدونين؟ ماذا يفعل؟ هل يرتبك؟ ام يدخل عند هذا المدون ويأخذ ينهال علية بالشكر والمدح والثناء حيث انة اعطاة ثقة بالنفس ليست بقليلة؟



وبعدما كانت المدونة ملموسة الكترونيا فقط وجدنا لان من اساتذة التدوين من يحاول ان يأخذ بأيدى مصير المدونة حتى تكون ملموسة لكل الاطراف سواء فى الكتب او على الصفحة الالكترونية وهى خطوة ايجابية وفعالة من وجهة نظرى وخصوصا فى وقتنا الحالى فالذى لم يستطيع ان يتابع المدونة من خلال الانترنت فهو سهل علية الان ان يتابعها من خلال الكتب وايضا نعود بمكانة الكتاب الى ما كان علية حيث ان القراءة الالكترونية اخذت مكان الكتاب واحتلت المرتبة الاولى فى القراءات ولم يعد أحد يهتم بالكتاب



اخر ما انهى بة كلامى هو استعجاب لحال الشباب اذا كان لدينا شباب قادر على الكلمة وقادر على التفكير وقادر على الكتابة وقادر على التفاعل مع الاحداث الداخلية والخارجية لماذا لايؤخذ برأية فى هذة البلدة؟ وماذا يفعل هؤلاء الشباب اذا قامت الدول الحاكمة بقطع وسائل الاتصال مثل الانترنت عن هذة البلد ماذا نفعل؟

هل نقوم بعمل شبكة عنكبوتية تخص الجزء المظلوم من العالم أم سيحل الصمت المكان

Wednesday, May 7, 2008

عقبالك يوم ميلادك






فى عيد ميلادى ال22 احب اقول شوية حاجات لنفسى
تسمحلى اعترفلك بأنك بجد حبيبتى ومش هقولك كل سنة وانتى طيبة وبس

هاقولك كل سنة وانتى حببتى وانتى صديقتى وانتى معايا وانتى مقومانى وانتى مقويانى على الطاعة وانتى مسعدانى فى عمل الخير كل سنة وانتى دايما معايا وانتى دايما فهمانى وانتى مش عصيانى وانتى انا .... ومش هاقولك غير اللى عاهدتك علية وغير اللى عاهدتينى علية لكن هاخليكى تقولى اللى انتى نفسك فية وانا عارفة وفاهمة انتى عايزة تقولى اية قولى ياحببتى انهاردة عيد ميلادك انتى قولى يلا:

قل أن نسكى ومحياى ومماتى لله رب العالمين

قل ان نسكى ومحياى ومماتى لله رب العالمين

قل ان نسكى ومحياى ومماتى لله رب العالمين

احب اقول عنى ان بجد كل سنة بتزيد من عمرى وكل ما اكبر سنة تفكيرى بيختلف واسلوبى بيختلف نظامى بيختلف رؤيتى للحياة بتختلف فهمى لدينى بيختلف وفهمى للدنيا بيختلف عايزة اقول انى بحب كل سنة فى عيد ميلادى اقيم السنة اللى عدت واشوف اية اللى محققتوش فى السنة دى واحاول انى احققة مع نفسى باردو السنة دى ودى حاجة فى حد ذاتها بحبها ...بحب انى اتغير وبحب ان كل سنة من عمرى مضاعش هباء بحب انها تأثر فيا وأثر فيها ودة لية معنى انى بتعلم ودة فى حد ذاتة شى فعال وايجابى وكمان لة تأثيرة السحرى عليا
نصيحة لكل الناس حب نفسك حب طبعك حب حياتك هتلاقى نظرتك اختلفت حاول انك تخلق من النفس الوحشة حاجة حلوة تسعد بيها نفسك حاول انك تقوم نفسك وتكون انت مؤثر عليها هتلاقى الامور بقت حاجة تانية خالص بس مش معناها انك تكون انانى اقصد حب نفسك عشان هيا نفسك هاتعيش وتموت وهيا ملازماك فى الدنيا يبقة الاولى انك تصلحها وتعدل منها ..اتمنى تكون رسالتى وصلت

بشكر كل الناس اللى افتكرتنى فى عيد ميلادى واتمنى من الله عز ووجل ان يديم اعمارهم بالصحة ويطيلها بالعافية



وكل سنة وانتوا من المهنئين والطيبين

تحياتى

Wednesday, April 30, 2008

المدونون.....الصحفيون الجدد

كنت قاعدة بقلب فى قنوات التليفزيون وقلبت على قناة الجزيرة لقيت برنامج بيتحدث عن المدونات وعامل تقارير عن معظم المدونات وكان اسمة تحت المجهر وعنوان الحلقة كان هو المدونون...الصحفيون الجدد وبما اننى فى مجال التدوين استوقفنى العنوان فاجلست وشاهدت بكل انتباة وكان البرنامج بيتحدث عما تتناولة المدونات من احداث مثل التعذيب فى اقسام الشرطة واضراب يوم 6 ابريل وما فعلتة بعض المدونات مثل مدونة الاخ كريم البحيرى عمال مصر عندما نزل وصور عمال المحلة وصور الاعتصامات والاضراب ومشاهد تهلك القلب حزنا وتقطعا على حال المصريين وحال الوطن والحكومة والنظام وكان من ضمن المدونين الرائعة نورايونس ووائل عباس صاحب مدونة الوعى المصرى وحسام الحملاوى صاحب مدونة عرباوى واظهر البرنامج ايضا حركة لم اسمع عنها قط وهى حركة شايفينكم واظهرت مدى تاثيرها فى الانتخابات السابقة وفى يوم الاضراب وما لم أكن أتخيلة أن المذيعة بثينة كامل قد تركت مجال الاعلام واتجهت الى مجال التدوين مما جعلنى افكر لهذة الدرجة التدوين اصبح مجال للاهتمام فى مصر؟
لدرجة ان تقوم الحكومة بفتح مكتب خاص للانترنت ومتابعة المدونات الاكثر قلقا؟
هل فعلا الحكومة تطالب بوضع قانون للتدوين والمدونات فى مصر؟
هل سيكون المدونون هم الصحفيون الجدد؟
هل سيكونون قادرين على فعل ما لم يستطع فعلة الصحفيين والمراسلين والاعلامينن؟
هل المدونات صداع فى دماغ الحكومة كما قال حسام؟
كما فعل قناص تارجيست بالمغرب عندما كشف عن قضية الرشاوى التى يتقضاها الضباط ولم يستطع اى احد معرفة من هو هذا الرجل ولا الامساك بة
بالرغم من اننى لم اشعر بخطورة التدوين الى هذا الحد لكن عندما شاهدت هذا البرنامج وجدت فعلا ما لم كنت اشعر بة من قبل
انا اتصور انة سيكون فى المستقبل شأن عظيم للمدونات والمدونين وستكون لهم جمعيات ومؤسسات تجمعهم وتتبناهم وسيكون لهم محاضرات ومؤتمرات هامة يحضرها شخصيات عظيمة وتتناولها وكالات الصحف والاعلام وسيكون لهم نادى يجتمع فية المدونون بل واكثر من هذا سيكون للمدونين نقابة وسيكون لهم الاحقية فى حضور بعض المؤتمرات ولن يهاجمهم رجال الامن والشرطة مرة ثانية لانهم سيكونون ذو مركز قوة فى المجتمع ولكن الاهم من هذا كلة ..........
هل ستكون المدونات فى صالح مصر والشعب ام سيظهر وجها اخر لا نعلمة وهل ستنتهك المدونات خصوصية الاشخاص بحيث من حق كل مدون يصور بالصوت والصورة ما يريدة ولا يهم خصوصية الاخر ام ماذا؟
واخيرا هذة عنواين المواقع التى ذكرتها
http://egyworkers.blogspot.com/مدونة عمال مصر لصاحبها كريم البحيرى
http://misrdigital.blogspirit.com/مدونة الوعى المصرى لصاحبها وائل عباس
http://arabist.net/arabawy/مدونة عرباوى لصاحبها حسام الحملاوى
http://norayounis.com/مدونة نورا يونس وهيا غنية عن التعريف طبعا
http://ensaa.blogspot.com/مدونة انسى وفيها مشترك عدد من المدونين لكن منهم انجى اللى ظهرت فى البرنامج
نعم للتدوين .......نعم للمدونون

Saturday, April 26, 2008

شيئا سايبقى بيننا




استيقظت صباحا على صوت المنبة فى ميعادى المعتاد كى ابدأ يوما جديدا ولكنى شعرت ببعض الكسل وحدثت نفسى

وانا مابين النوم

والافاقة بأن أتأخرعن ميعادى نصف ساعة فاتركت المنبة يرن مرة تلو الاخرى حتى أفقت ورفعت رأسى من على وسادتى وبالفعل نزلت من على السرير ووجدت امى جالسة فى الصالة والنوم يغلبها فقلت لها


قومى ياماما نامى....


قالت لى: حاضر يا حبيبتى هعملك الاول السندوتش والشاى وبعدين أدخل انام


وهى لاتستطيع حتى أن تنظر لى وهى تتحدث من كثرة غلبة النوم عليها


ووجدت نفسى افكر فى النصف ساعة التى استحللتها لنفسى وشعورى بأنها اجمل نصف ساعة ممكن أن تمر عليا


أنتبانى شعور بأنى أنانية وهذا الذى أسمع عنة قد وجدتة فى نفسى أنانية الابناء فعلا انا كنت أنانية جدا ولذلك أعتذر لكى ياأمى


ما هذا الحنان يا أمى تسهرى وتأتى على نفسك كثيرا من أجلنا وما هذة الانانية التى استخلصتها لنفسى


مالى لااشعر بتعبك ألا قليلا جدا ومالى قاسية القلب عليكى هكذا


والله يا أمى أنى من غيرك مخلوق من عدم ومن غير وجودك لا يجود نكهة للحياة


فأنتى أحلى زهرة فى حياتى وأنتى أحلى صدر يضمنى وأنتى أحلى أبتسامة أراها فى الصباح


يارب جازى أمهاتنا عنا خير الجزاء وأجعلنا قرة أعين لهم



في كل يوم سوف أغرس وردة بيضاء
فوق جبينها
ليضيء قلب الأمهات
إن ماتت الدنيا حرام أن نقول
بأن نبع الحب مات
قد علمتني الصبر في سفر النوارس
علمتني العشق في دفء المدائن
علمتني أن تاج المرء في نبل الصفات
أن الشجاعة أن أقاوم شح نفسي‏
أن أقاوم خسة الغايات
بالأمس زارتني‏..‏وفوق وسادتي
تركت شريط الذكريات
كم قلت لي صبرا جميلا
إن ضوء الصبح آت
شاخت سنين العمر يا أمي
وقلبي حائر
مابين حلم لا يجيء‏
وطيف حب مات
وأفقت من نومي
دعوت الله أن يحمي
جميع الأمهات



شعر/فاروق جويدة

Friday, April 18, 2008

كلمتين وبس

من حوالى شهرين كدة اخدت تطعيم ضد الكبدى بى ودى كان اسمها جرعة اولى المفروض انهم بيكونوا 5 جرعات
المهم تانى جرعة بتكون بعد الجرعة الاولى بشهر من ميعاد الجرعة الاولى وفعلا بعد شهر من ميعاد الجرعة الاولى
اخدت الجرعة الثانية نسيت اقول انى لما اخدت الجرعة الاولى مافيش اى اعراض او اى حاجة حصلتلى باختلاف الجرعة التانية
حصلى العجب اول ما اخدتها وقفت دراعى كلة وبعدها بدأت الدوخة وىوىوىوىوىوى..... الـــــــــــــخ
المهم ان الامر كان غير طبيعى سألت الناس اللى اخدوها معايا اية الاخبار نفس الاعراض بالظبط
بدأ الشك يتسلل داخلى قولت اتصل بدكتورة كانت اخدة اخر جرعة معاها البيت عشان تاخدها فى البيت تقرا زجاجة التطعيم
وبالفعل حدث ما كنت اتوقعة..............
التطعيم غلط.......طعمونا حاجة تانية اسمها رباعى واللى يعرف التطعيم دة اكيد هيكون حاسس بينا كنا عاملين ازاى
بجد كنا بنموت من الالام الحقنة وانك تحس ان دماغك دى تقيلة قوى وفاضية ومعها اعراض تانية بلاش اقولها عشان محدش يقرف
المهم انهم قالوا ان لو عدا اسبوع ومحدش حصلة حاجة يبقى الحمد لله مش هايكون فى حاجة
وفعلا الحمد لله محصلش حاجة ودة بفضل ربنا بجد وربنا سترها مع الناس المسئولة
بس اللى كنت عايزة اقولة انى لما سألت دكتورة الصيدلة اللى عطتنا زجاجة التطعيم قالت انها معرفتش تقرا اسم التطعيم
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
يا جماعة فى حاجة اسمها اهمال واحيانا بتكون عواقب الاهمال دى خطيرة بجد
وترتب علية بقة ان الناس اللى كان ليها جرعة تانية مأخدتش طبعا جرعتها لانها خايفة يحصل نفس اللى حصل لينا
اتمنى اننا نراعى ربنا شوية فى اعمالنا وافعلنا لان لو ربنا معاك انهاردة وسترها معاك المرة دى
الله اعلم اية اللى هيكون المرة القادمة

Saturday, April 5, 2008

الحــــــــرية

تعريفات عن الحرية

جون لوك‏، يرى ..ان الحرية هي، القدرة والطاقة اللتان يوظفهما الانسان لاجل القيام بعمل، معين او تركه

‏جون ‏استيوارت، ميل‏، يقول: (ان الحرية عبارة عن قدرة الانسان على السعي، وراء مصلحته التي يراها، بحسب منظوره، شريطة ان لا تكون، مفضية الى اضرار الاخرين

‏كانت‏، فيقول: (الحرية عبارة عن استقلال الانسان عن اي، شي‏ء الا عن القانون الاخلاقى

آية اللّه جوادي :الحرية، من المنظور الاسلامي، عبارة عن، التفلت والتحرر من عبودية واطاعة غير اللّه تعالى‏

مع كل هذا لم نصل الى الحرية المطلوبة او الكافية لاتخاذ قرارت

فى الحقيقة ان البنت بوجة خاص فى مجتمعنا الشرقى حتى الان لم تملك الحرية الكافية لاتخاذ قرارت مصيرية فى حياتها ومنها مسألة الارتباط اذا كانت العائلة ترتضى للبنت هذا الشخص كازوج لها فاليس لرائيها قيمة فى هذة المسألة
فى عهد الرسول صلى الله علية وسلم كان للفتاة شأن عظيم وكانت لها الحرية اكثر من هذة الايام وبسبب الابتعاد عن الدين نوعا ما.. اختطلت الامور على الناس ولم يستطيعوا ان يستخدموا الحرية فى طريقها الصحيح
الحرية جزء لا يتجزأ من الانسان

ويقولون لما ازدادت معدلات الطلاق؟؟؟؟؟؟

Sunday, March 30, 2008

الحب .. فى الزمن الحزين

قد يسألونك ِ في زحام العمر عن أمل ِ الحبيب
عن عاشق ٍ ألقت به الأمواجُ في ليل ٍ كئيب
وأتاك ِ يوما ً مثلما
تلقى الطيورُ جراحها فوق الغروب
ورآك ِ أرضا ً كان يحلمُ عندها
بربيع عمر.. لا يذوب

لما بتقابل الناس الغلط فى الوقت الصح و لما بتقابل الناس الصح فى الوقت الغلط
عارف احساس الندم بيبقى قد اية
عارف احساسك انك بتفقد حاجة غالية عليك

لما تلاقى حاجة غالية قوى وتلاقيها بتضيع منك وانت مش عارف تعمل حاجة

لما تبقة متأكد ان ربنا مش بيعمل حاجة غير لما تكون فى مصلحتك
وفى نفس الوقت تلاقيها غير اللى اانت نفسك فية

لما تبقى مغصوب على حاجة ومش عارف تتصرف
عشان فى ناس عايزة كدة
لما تحس انسان قوى وبعدين يطلع احساسك غلط


لا تحزني..
فالآن يرحل عن ربوعك ِ
فارسٌ مغلوب..
أنا لا أصدقُ كيف كسّرنا
وفي الأعماق ِ.. أصواتَ الحنين
وعلى جبين ِ الدهرِ ماتَ الحبُ منَّا.. كالجنين
قد يسألونك ِ.. كيف ماتَ الحبُّ ؟؟
قولي...... جاءَ في زمن ٍ حزين !!


فاروق جويدة

Tuesday, March 25, 2008

الجزء التانى... محدش يضحك

السلام عليكم ورحمة الله وبركاتة



حبيت قبل ما أبدأ اكمل البوست اللى فات حبيت اوريكوا حاجة عجبتنى جدا واتمنى ان الصور تكون واضحة وعلى فكرة انا مشوفتش الاستيكر فى المكانين دول بس انا شوفتها كتير بس للاسف مكنتش بلحق اصور




الله اكبر....... ولله الحمد






لما رحت بقة الموقف وقبلت الحاجة اللى قالتلى انهاردة اية؟ وجوابتها قالتلى عشان كدة

قولتلها عشان كدة أية ياماما؟

قالتلى يوم الخميس مش بيبقى فية مشاريع خالص

رديت انا بقة قولتلها ....لا والله وقولت فى بالى (يارتنى ما عرف) وكان هاين عليا اعيط بعد كوباية الماية الساقعة اللى رمتها عليا ربنا يسامحها بقة المهم وقفت شوية وفعلا مافيش مشاريع خالص

قعدت افكر اعمل اية؟ قولت خلاص اتمشى لغايط حتة اسمها الساعة فكتوريا فيها هناك مشاريع للمندرة

ملحوظة ...انا كنت جعانة جدااااااااااا وماكنش معايا فلوس عشان أشترى أكل ولا حتى أركب مواصلة لغايط فكتوريا

وطبعا عملت باردو خمسة رياضة واتمشيت شارع الجلاء كلة لغايط ما وصلت الحمد لله الساعة

كان كل خوفى ساعتها بقة انى اروح للساعة وملاقيش مشاريع متهيالى كنت هنام على الرصيف واريح دماغى

لكن الحمد لله رحت ولقيت فعلا مشروع بيحمل مندرة وركبت الحمد لله ومش عارفة اوصفلكوا الانشكاح اللى كنت فية اول ما لقيت مشروع بيحمل مندرة

ومشى المشروع.............وفجأأأأأأأأأأأأأأأأأأأأأأأأأأأأأأأأأأأأة! ان ان ان أأأأأأأأأأأأأأأأاة

بــــــــــــــــــــــــــــوم

العجلة فرقعت ... ماذا تفعل لو كنت مكانى

انا ساعتها فضلت اضحك ضحك اول ماسمعت صوت العجلة فرقعت

شكل كدة نحسى هو الى فرقع العجلة دى يومها مش ممكن على المواقف اللى بتحصلى وراة بعضها

اللى افتكرة ساعتها انى نزل عليا هستريا ضحك ومعرفتش اوقف نفسى من الضحك ونزل السواق عشان يركب الاستبن والحمد لله انة كان معاة الاستبن بس اللى مكنش معاه بقة المفتاح اللى هيربط بية الاستبن

والناس كلها نزلت من المشروع وانا فضلت قاعدة

السواق قالى انزلى اركبى حاجة تانية... قولتلة لالالالالا

انا معاك لغايط ما تركب الاستبن ان شالله نبات هنا

قولتلة انا مش هعرف اركب حاجة من هنا

ضحك وقالى متخافيش انا هاركبك.. وفعلا وقفلى مشروع وركبنى والمفأجاة

انى روحت والله رووحت ومش مكنتش مصدقة انى عرفت اروح اليوم العجيب دة

استحالة انساه ابدا.....اتمنى ان محدش يحصلة زى اللى حصلى

وحد يقولى بقة الدرس المستفاد من حدوة جحا ويوم الخميس دى؟

Wednesday, March 19, 2008

يوم فى حياتى...بس محدش يضحك

من يومين كدة كان فى زحمة عجيبة جدا من ساعة ما نزلت من البيت لغايط ما وصلت الشغل زحمة اول مرة اشوفها فى اسكندرية. عمتا وصلنا الشغل طبعا ومضينا تأخير على 15 دقيقة بس عشان لسة فى نصف الشهر ومش هاقولكوا بقة على دلع اخر الشهر بقة.
ما علينا باردو. اللى كنت عايزة اقولة أن زحمة انهاردة دى فكرتنى بموقف حصلى أيام دراستى بالمعهد
وأليكم الموقف يا حضرات بس محدش يضحك
كنت راجعة من منطقة أسمها الحضرة لو حد يسمع عنها المهم أن وسيلة المواصلات الوحيدة اللى تعتبر سهلة هيا القطر وفعلا قررت انى اركب القطر (ويارتنى ما ركبت) القطر فضل ماشى تمام قوى لغايط محطة ( الرمل) وصلنا بقة للمحطة اللى بعدها وهيا النقراشى( فكتوريا)
والقطر عطل قالوا محدش ينزل القطر اللى وراة هيحركة (ويارتنى نزلت) جة فعلا القطر وحرك قطرنا بكام متر بعد المحطة ووقف تانى أية يا جماعة اللى حصل القطر التانى وقف فى المحطة عشان ينزل ركابة....طيب ماشى
ربع ساعة عدت.........يا جماعة القطر عطل......يالهووووووووى
متخافوش فى قطر تالت هايجى يحرك القطرين( يزق بالعامية قوى) طيب ماشى وفعلا جة القطر التالت ( والتالتة تابتة) حرك هو كمان شوية وعطل .................... جة محصل التذاكر( الكومسرى) قال يا جماعة أنزلوا القطر دة هايروح الورشة
وطبعا من غير ما أوضح عملت خمسة رياضة ونطيت من القطر.......كان شكلى وحش قوى
وبعدين رحت على موقف المشاريع اللى فى فكتوريا..
اليوم واضح يا جماعة من أولة وصلت وملقيتش ولا مشروع
اسأل الناس هو مافيش مشاريع لية؟
واحدة قالتلى هو أنهاردة اية يابنتى؟
قولتلها الخميس يا حاجة قالتلى؟
أأأأأأأأأأأأأأأأأأأأأة عشان كدة
وبعدين انا أيدى وجعتنى من الكتابة هاكملكوا الموقف فى البوست الجاى ان شاء الله
لان اللى جاى محدش هيصدقة ابدا وبجد اليوم دة يعتبر يوم فى حياتى
وأستحالة انساة اصلها كانت مأساة والظريف فى الموضوع أن اليوم دة كنت مروحة فرحانة قوى عشان خلصنا محاضرت بدرى وهروح بدرى
ويا خيبة الامل..................أستودعكم الله

Thursday, March 13, 2008

حملة حماية




حملة حماية دى حملة اطلقها الاستاذ عمرو خالد من أجل ايقاف المخدرات وعلاج الشباب المدمنين والهدف من المشروع اننا نحاول ننشر الاستيكر بتاع حملة حماية فى كل مكان حتى لو كان على موبايلك يلا يا جماعة نكون ايجابين ونحاول نساعد فى الحملة دى وعايزة اقول ان الناس كلها مستنية متش الاهلى والزمالك اللى هيكون يوم الجمعة القادمة عايزة اقول ان الاستيكر بتاع حملة حماية هيكون متوزع على 30 الف مشاهد فى الملعب وغير احتمال يكون اللعيبة لابسة كمان تشيرتات مطبوع عليها استيكر حملة حماية اتمنى ان الشباب تستجيب للحملة وتبدأ فى عمل الخير


كمان لو تعرف حد مدمن حملة حماية بتدعوا المدمنين أن يتصلوا على الارقام الموجودة على موقع عمرو خالد عشان يتعالجوا وكمان لو اسرعت ممكن يكون العلاج مجانى وهيكون فى رعاية خاصة ومتابعة جيدة من قبل الاستاذ عمرو خالد واعضاء حملة حماية وعايزة اقول كمان ان قناة مودرن سبورت بترعى الحملة والبيت بيتك مع محمود سعد بيرعى الحملة ورياضين بيرعوا الحملة وى كمان فى دبى الشرطة بتاعت دبى بادرت على تنفيذ الخطة


مش ممكن تكون الناس دى كلها بتتحرك واحنا لسة واقفين...... انا قولت يمكن يكون جزء من اللى عندى


اخيرا... الللهم اجعلة فى ميزان حسناتنا


واهو لينك الموقع عشان نبدأبالتحرك والمتابعة هتكون مع عمرو خالد على موقعة




حملة حماية ... أوقف المخدرات.. غير حياتك


Tuesday, March 4, 2008

أخبار خفيفة

بارك أوباما: أنى صديق أسرائيل ولم أكن مسلما ولم أتعلم فى مدرسة أسلامية وعندما أقسمت أقسمت على التوراة وعلى أننى مسيحى
لاداعى للتفاؤل
الفنان عمار الشريعى: متهم بقطع شجرة عمرها أكثر من 100 عام
ونعمة الاتهامات
أولمرت: لابد من محاكمة الارهابين والمقصود بهم الاخوة الفلسطنين اللذين يقاوموا الاحتلال
اللى هما أصحاب الارض والحق
المذيعة منى الشاذلى فى سؤالها للسفير الامريكى فرنسيس أذا أحتلت أمريكا يوما ما وحاولتوا انتوا ان تدافعوا عن حقكم من هذا الاحتلال هل ترضى أن يوصفكم العالم بأنكم ارهابين؟؟؟؟؟؟؟؟؟؟؟؟؟؟؟؟؟؟؟؟؟؟؟
لعبة ال بلوت تسبب أزمات فى السعودية؟؟
أسرائيل: ستقوم بعمل هولو كوست فى قطاع غزة
السيد عباس أبو مازن يرتدى حذاء بمبلغ 20ألف يورو
حاجة تجن والله
أين الامان يا بلدى ؟ وأبناءك يموتوا على أرضك بدون أى ذنب ولا أحد يتكلم أو يدين ولنا العزاء ......وداعا سماح
حامى الحما يطالب اتحاد الكورة بحسم قضية الحضرى ...... ولم نسمع تصريح واحد عن الطفلة سماح
ولا واحدة فى وش الفجر تبرطع مالية الدنيا صوات قال اية جوز خالتوا ام احمد سلفة اخوها السيد مات
وصول السفينة الحربية كول أدام إلى لبنان
رجل يموت فى طابور العيش فى الدقهلية
السعودية وغيرها من البلاد تسحب رعياها من لبنان
نزلت إلى مصر وجدت فيها وزارة للتنمية الاقتصادية ولم أجد فيها تنمية أقتصادية
الامام محمد عبدة فى زيارتة الى فرنسا قال: وجدت أسلاما ولم أجد مسليمن
نجل وزير التنمية يوقع على أيصالات أمانة للضحايا بمبلغ 11مليون جنية 30 ضحية يتهمون ابن الوزير بحصولة على أموالهم
ونعم التنمية
لماذا تعاقبوا الحضرى ؟ ولم تعاقبوا أشرف مروان قبل وفاتة؟
لطالما رقصت الكلاب على جثث الاسود لاتحسبن برقصاها تعلو على أسيادها تظل الكلاب كلاب والاسود أسود
من أقوال حكيم: أكتشفت يابنى ان اعظم فضيلة فى الحياة الصدق وإن الكذب وإن نجى فالصدق أخلق بمن كان مثلك يا بندر
تابعوا معى حلقات أخبار خفيفة

Friday, February 29, 2008

يعيش أهل بلدى


وبينهم ما فيش
تعارف
يخلي التحالف يعيش
تعيش كل طايفه
من التانيه خايفه
وتنزل ستاير بداير وشيش
لكن فى الموالد
يا شعبي يا خالد
بنتلم صحبه
ونهتف .. يعيش
يعيش أهل بلدي


يعيش المثقف على مقهى ريش
يعيش يعيش يعيش
محفلط مزفلط كتير كلام
عديم الممارسه
عدو الزحام
بكام كلمة فاضيه
وكام اصطلاح
يفبرك حلول المشاكل قوام
يعيش المثقف
يعيش يعيش يعيش
يعيش أهل بلدي



يعيش التنابله
فى حي الزمالك
وحى الزمالك
مسالك مسالك
تحاول تفكر تهوب هنالك
تودر حياتك
بلاش المهالك
لذلك إذا عزت توصف حياتهم
تقول الحياة عندنا
مش كذلك
وممكن تشوفهم فى وسط المدينه
اذا مر جنبك
أتومبيل سفينه
قفاهم عجينه
كروشهم سمينه
جلودهم بتضوي
دماغهم تخينه
سنانهم مبادر تفوت فى الجليد
ما فيش سخن بارد
بياكلوا الحديد
ما دام نهر وارد
وجاي م الصعيد
تزيد الموارد
كروشهم تزيد
وتسمع وتسلم
بأن التنابله
أو الأكالين
حيسمح كبيرهم
ويعمل مقابله
مع الفلاحين
ويحصل تحالف
ما بين الجميع
ونملا المصارف
بدم القطيع



أطيع الخليفه
أطيع والديك
أطيع التنابله
دا مفروض عليك
وتزرع وتبعت لحي الزمالك
وحي الزمالك
مسالك مسالك
تحاول تفكر تهوب هنالك
تودر حياتك بلاش المهالك
لذلك
إذا حد جاب لك سيرتهم
تبسمل تكبر
وتهتف كذلك
يعيش التنابله
يعيش يعيش يعيش
يعيش أهل بلدي




يعيش الغلابه
فى طي النجوع
نهارهم سحابه
وليلهم دموع
سواعد هزيله
لكن فيها حيله
تبدر تخضر جفاف الربوع
مكن شغل كايرو
ما يتعبش دايره
لا ياكل
ولا حتى يقدر يجوع
يا غلبان بلدنا
يا فلاح يا صانع
يا شحم السواقي
يا فحم المصانع
يا منتج
يا مبهج
يا آخر حلاوه
يا هادي
يا راضي
يا عاقل
يا قانع
ما تتعبش عقلك
فى شغل السياسه
وشوف انت شغلك
بهمه وحماسه
وعود عيالك فضيله الرضا
لأن إحنا طبعا
عبيد القضا
ورزقك ورزقي ورزق الكلاب
دا موضوع مؤجل ليوم الحساب
كمان الصحافه
حتكتب فى حالتك
وتنشر مناظر لخالك وخالتك
وتتطلع يا مسعد عليك الغناوي
وتسمع باسمك
فى قلب القهاوي
تحبك مشيره وبنات الجزيره
وقصه غرامك
تشيع فى الرداوي
يعيش عم مسعد
يعيش يعيش يعيش
يعيش أهل بلدي



Monday, February 25, 2008

Sunday, January 13, 2008

يا عم غايب ارجع بقة

بقالى كتير مقعدتش على النت وبقالى كتير ماتبعتش مدونات
ودة مش بسببى والله دة لان الكمبيوتر قرر انة مش هيشتغل تانى لان الهارد قال بااااااااااااااى
لكن عما قريب ان شاء الله هاتبع كل المدونات ادعولى انتوا بس
وكل سنة وانتوا كلكوا طيبين مع انها متاخرة
وميرسى لكل اللى سأل عليا واللى مسألش
تحياااااااااااتى