السلام عليكم ورحمة الله وبركاتةبقالى كتير غايبة عن التدوين والمتابعة وطبعا اسفة جدا انى مش متابعة حد خالص بس معلش ظروف بجد كانت جامدة
بس الحمد لله ربنا بيهون الامور المهم ان التدوين وحشنى جدا وكمان المدونات وحشتنى جدا جدا
لكن الموضوع اللى هاكتبة انهاردة لولاة بجد مكنتش هاكتب حاجة خالص دلوقتى انتو عارفين رمضان على الابواب ولازم الواحد يجهز نفسة للشهر العظيم دة
المهم كل سنة وانتوا ومدونتكوا طيبين ودايما يارب للامام فى كل امور الحياة
مش هطول عليكوا لكن باختصار الموضوع هو الثلاث صور اللى فوق دول
كنت ماشية امبارح على البحر انا واهلى ومجموعة ضيوف وبعدين بدور على شط فاضى نقدر نقعد فية بصورة كويسة ونستمتع كمان باليوم
وانا ماشية لقيت واحد من بتوع امن الشواطئ قاعد على البحر وبهزر ومعاة وبقولة
هو مش البحر دة بتاع ربنا
قالى : اة
قلتلة: فى حد يدفع فلوس عشان يدخل بحر ربنا
قالى : اة
قلتلة: ازاى
قالى: عشان صاحب الشط دافع 3 مليون جنية فية
قلتلة: دافعهم لربنا
ضحك وقالى: لا للمحافظة
قلتلة: طيب احنا مالنا
قالى: بصى يابنتى شايفة المكان اللى انا صورتة دة.. الحتة اللى فيها بلاط
قلتلة : ايوة
قالى: دى كانت مصلى كنا بنصلى فيها
وكان فى واحد مهم جدا جدا جدا جدا واخدين بالكو من جدا دى وكنا معاه واحد تانى زائر كان عندنا فى اسكندرية
وبعدين عدى صاحبنا المهم دة من على البحر وشاف المصلى دة والظاهر انة معجبوش على طول أمر بأزالتة
متهيألى كدة انة مكنش مظهرة حضارى فى نظرة يعنى.. فاقال شيلة اتشال طبعا لكن الديسكوهات اللى مليانة البحر من اولة للاخرة
مظهرها حضارى اكيد طالما بتجيب فلوس
وعشان صاحبنا المهم دة كمان كان جاى كنت قبلها فى يوم فى منتجع عند مدخل اسكندرية كدة كانت العملية مقفولة على الاخر ومصفحات امن مركزى نازلة وامن مركزى مرصوص من اول مدخل اسكندرية لغايط محطة مصر وماسك كمان شارع قناة السويس
انا بجد مش عارفة اقولة اية ؟ غير انك هاتعيش وتموت وتفضل فى سجن الحياة
مش هاقول غير .... ولا اقولكوا احنا قولنا كتير
خلية يشيل اما نشوف هايسدد منين فى الاخرة
تحياتى
10 comments:
السلام عليكم أزيك
أكيد حاجة غريبة جدا والتفكير بالطريقة دي مش عايز أتكلم في الموضوع كتير بس لازم أقول إن ربنا هو إلي منحنا كل دة وفي الأخر بدل ما يتأمر ببناء مسجد يشيل زاوية لا إله إلا الله
أحمد عنتر
حورس
أزيك يا اسماء
بجد حاجه مستفزه
انا كنت في شغل في اسكندريه عندكوا لمده يومين
ونزلت بالليل اقعد شوي علي البحر دخلت شاطئ اسمه البوريفاج في ميامي
قالي الفرد ب10 جنيه
دخلت وقعدت ربع ساعه وقلت اخرج اجيب اي حاجه اكلها وارجع
قالي ممنوع اللي يخرج ميدخلش تاني
دي تعليمات بعد الساعه 6أدور علي اي حد أكلمه مفيش
شفتي بقي
غريبة جدا يعني
برغم كونها مساحة غير مستغلة
مش بأول الموضوع بنظرية المؤامرة
بس واضح كده ان مفيش مبررات واضحة
وانتي ازيك وازي الصيف عندك كده؟
طبعا انا بحسدك وبحسد اي حد مدينته ساحلية :))))
احمد
اللهم اجرنا فى مصيبتنا
اكيد عندك حق
ميرسى ياباشا على المرور
تحياتى
محمد
الحمد لله ازيك انت يا محمد
كل سنة وانت طيب يا ابو عبدالله جبت الفوانيس ولا لسة؟
بص يا محمد فعلا ارتفاع الاسعار بقة فى كل حاجة
وفعلا انا مصدقاك لان دة حصل معايا بس انا يومها قمت بالواجب مع صاحبنا دة عشان مش هايحدد اقامتى اخينا دة ومش داخلة القلعة مثلا
وعمتا احنا اسفين ياباشا عن الموقف دة
وندعى ربنا انها متتكررش تانى
تحياتى
السلام عليكم ..
زائر جديد D:
الحد المهم جدا جدا جدا ده بقي هو الريس ولا ايه ؟
اصله قعد فترة قارفنا هنا في اسكندرية
مدونتك جميلة ..
تحياتي
سلام
مزمز
عندك حق طبعا
فعلا المساحة غير مستغلة بالمرة ومش لاقية سبب وجية للموضوع غير اللى قولتة
اما بقة لموضوع المدينة الساحلية دة
لتصدق انى مبقتش احب الصيف عندنا بسبب الارف اللى الواحد بيشوفة بجد من زحمة وعربيات كتير ومواصلات غلسة وحاجات كتير بتخلينا مش واخدين راحتنا ودة غير بقة ان بجد الشتا فى اسكندرية امتع واحسن
عمتا الحمد لله اكيد احنا فى نعمة ومش حاسين بيها
نورتنى ياباشا وكل سنة وانت طيب
تحياتى
عبد الفتاح
اهلا وسهلا بيك ونورتنا
لكن سؤالك صعب شوية
انا شايفة اننا نقضى رمضان فى بيتنا احسن ما نقضية فى مكان تانى
ولا اية؟
بقولك صحيح هوة دة شاطئ المندرة
أصلي عديت عليه وأنا رايح المعمورة تقريبا هو علي العموم هوة يستاهل يكون غالي بصراحة شكله حلو ومعمول فيه توضيبات كتير وللأسف شعب مصر ليهم سلوكيات مشينة وأكيد أنت عارفة بيعملوا إيه علي البحر بيكلوا ويرموا الأكل في الأرض ومواقف تانية مخجلة بس في النهاية برده لازم أكرر كلامي وأقول إن لازم يكون فيه مسجد وشكرا مرة تالتة هههههههههههه علي الموضوع الجميل
حمد لله علي السلامة يا جميلة
رمضان كريم ،كل سنة وانتي طيبة
Post a Comment