دكتور مصطفى محمود

الله هو المحبوب وحده على وجه الأصالة وما نحب فى الآخرين إلا تجلياته وأنواره فجمال الوجوه من نوره وحنان القلوب من حنانه فنحن لا نملك من أنفسنا شيئاً إلا بقدر ما يخلع علينا سيدنا ومولانا من أنواره وأسمائه

Saturday, June 2, 2007

من احمد فؤاد نجم لمحمد حسنى مبارك فى عيد ميلادة


سيدي الرئيس

في عيد ميلادك الكام وسبعين

كل سنة وأنت طيب

واحنا مش طيبين

كل سنة وأنت حاكم

واحنا محكومين

واحنا مظلومين

واحنا متهانين

ويا ترى يا حبيب الملايين

فاكرنا ولا احنا خلاص منسيين

فاكر المعتقلين

فاكر الجعانين

فاكر المشردين

فاكر اللي ماتو محروقين

فاكر الغرقانين

الله يكون في عونك - هاتفتكر مين وللا مين

في عيد ميلادك الكام وسبعين

بقول لك كلمتين

الأوله

شيلتنا طين

وهل تعلم أن النيل بقى رشاح

والجو أصبح بيئة والعيشة ولعة

والشرفا قلوبهم عالبلد والعة

وانت عاملهم مذبحة ولا بتاعة القلعة

والاقتصاد سداح

والسرقة بقت كفاح

ومصر متاحة بس للسياح

وعرض البلد بقى مستباح

والتانية

ورتنا الويل

دا الخطوة في عهدك بقت ميل

والضحك بقى نواح وعويل

والكوسة

عارف الكوسة

ممكن أقولك فيها موواويل

والجامعة بقت يا إما كباريه أو دار مسنين

والشباب معظمهم من غير خمرة سكرانين

والعلم عز على المتعلمين

والأساتذة بقم دجالين

والقادة بقم طبالين

واديني في الهايف يا حبيب الملايين

والتالتة

عارف اليابانيين

زمان في سنة اتنين وخمسين

كان عندنا تروماي وكان عندنا علم ومتعلمين

وثقافة ومثقفين

وأدبا وعلما وفنانين

وكانو اليابانيين

بالنووي لسة مضروبين

وللصدقة مستحقين

دلوقتي إحنا فين وهما فين

هما فوق واحنا في أسفل سافلين

والرابعة

أمن البلد بقى تنين

والمحاكم اتملت مظالم

والعدالة بقت كمالة

وكلمة الحق في الزبالة

وأصحابها في الزنازين

والخامسة

القطاع العام…. عام

والفساد…. ساد

وفي جتة بلدنا بيرعى

أفتكر لجنابك إيه وللا إيه

وكل ذكرى ليك بدمعة

آآآآآآآآه آآآآآآآآه

أنا كنت حالف ميت يمين

أكملهم لك تمنية وسبعين

بس هاكفيهم ورق منين

وكل سنة وأنت

واحنا طيبين

14 comments:

مـحـمـد مـفـيـد said...

وكل سنه وهو طيب وهو مش طيبين

من القصائد الجميله جدا لاحمد فؤاد نجم
برافو يا اسماء

Mirage said...

القصيدة دى قريتها من سنة يمكن
بس بما ان الاحوال مش بتتغير فى مصر

فالقصيدة سوف تظل خالدة مخلدة الى الابد

ميرسى انك فكرتينا بيها

نبض اسكندرية said...

محمد


ميرسى وربنا ما يحرمنى من ردودك الحلوة دى

نبض اسكندرية said...

ميراج

والله هو التوبيك نازل متاخر شوية عن معادة اصلا بس يلا على ما عرفت اجمعها كلها

وعندك حق طبعا مخلدة فى اذاهننا

ميرسى لمرورك

shabaskandrany said...

يا جامد انتة

نبض اسكندرية said...

تلمذتك يا باشا

Ehab said...

مفيش فايده
انا مش عارف هما بعد كده هيعملوا فينا ايه مش مهم مفرقتش
تسلمي يا اسكندرانيه على القصيده الحلوه ديه
وبقالك فتره ساكته ليه
بس راجعه بكلمتين حلوين
ابقى تعالي نوريني متنسيش تجيبي هريسة احمد حسنين بس الساده من غير مكسرات لحسن احنا هنشبع تكسير بعد قصيدتك يا فندم
سلاااااااااااااااااااااااااام
لعروسة البحر المتوسط

نبض اسكندرية said...

شنكوتى

نورتنى والله

واكيد هيعملوا فينا زى السادات بالظبط

بس كل واحد ومعزتة بقة

عموما انا مش ناسية الهريسة وهجبهالك معايا

وخدها بدل تكسير

تحياتى

مريم said...

كان الله فى عون ريسنا الامين
هيفتكر بس مين ولا مين
مش كفاية شايل هو عز وابو العينين
كمان يشغل نفسه برعاياه الكحيانين
ايه الظلم ده يا عالم يا مفتريين

Anonymous said...

القصيدة جميلة جدا و شكرا ليكى قوى انا أول مرة أقراها..
قصيدة واقعية بغباء..شكرا مرة تانية

نبض اسكندرية said...

مريام

عندك حق اكيد الله يكون فى عونة

هو فاضى


كفاية علية سفريات شرم واجتماعات الانفوشى وتليفونات التهنئة من كانى وعيلانى وكفاية وكفاية وكفاية

وكفاية علية حفيدة هيغرلة البمبرز ولا هيشوف مصالح الشعب

ميرسى ليكى

تحياتى

نبض اسكندرية said...

Queen eraser

ميرسى ليك انت

ونورتنى

Mohamed said...

قصيدة جميلة

Unknown said...

assalamualaikum, I'm Indonesian and I'm a student in a university here. I'm aiming to researching about this poet one of Ahmad Fuad Najm, but I had difficulty to finding the book that containing the poet. can you giving me information for that? thank you before. wassalamualiakum