دكتور مصطفى محمود

الله هو المحبوب وحده على وجه الأصالة وما نحب فى الآخرين إلا تجلياته وأنواره فجمال الوجوه من نوره وحنان القلوب من حنانه فنحن لا نملك من أنفسنا شيئاً إلا بقدر ما يخلع علينا سيدنا ومولانا من أنواره وأسمائه

Thursday, June 19, 2008

ما تبرطمش كتير...

السلام عليكم ورحمة الله وبركاتة
عن حال أغلبية المصريين أعتنقوا المذهب البرطمى الذى أسسة بطريموس الاول
قبل وفاتة وفية يتحول الكائن البشرى او المواطن والمتواطن والوطن مع الوقت
الى برطمان مغلق؟
بصيت قبل كدة على حالك وحال صاحبك بصيتى على نفسك واسلوبك فى الكلام وعلى صحبتك محستوش اننا بقينا بنبرطم كتير
تفتكروا البرطمة مرض اجتماعى من الضرورى ان يتوارثة الناس من جيل الى جيل حتى يستمر هذا المذهب
عموما اللى خلانى اقول كدة انى مرة كنت راكبة مشروع او ميكروباص وكان فية لجنة وقفت المشروع وفى واحد كان راكب من الواضح انهم اشتبهوا فية او زى ما الناس قالت عايزين يتغدوا شكلهم... اعدوا استفسروا عن حاجات وبعدين شافوا واحد تانى سألوة هو كمان بعض الاسئلة وبعدين شكلهم لقوا الموضوع تمام فاقلة امشى
المهم ان أخينا التانى اللى سألوة كان عامل زى الكتكوت المبلول قدام بتاع اللجنة واول ما المشروع طلع قال بقة: والله لو كان قالى حاجة كنت عملت وعملت وعملت وهو حتة ...بتاع يعنى هايشوف نفسة عليا واخينا الاول يقولوا اهو دة برة خدمتة ولا يسوى حاجة
الظريف بقة فى الموضوع اية؟ انهم بيبرطموا على بعض
لية اعتدنا اننا نبرطم على الفاضى؟
بس ارجع واقول هما كمان هايمنعوا البرطمة عن الناس تبقة خانقة من كلة بقة يمكن فى انسان بيبرطم لانة مش قادر يعمل حاجة غير كدة فى الوقت الحالى
وحين ميسرة بقة
وكما قال شاعر الفرعون::::: دع المبرطم يبرطم ما يشاء
فكل ما قد يبرطمة
هراء..كم برطم المصريون قرونا
فما تغير بالبرطمة قضاء
إنا وضعنا للبرطمة حدودا
تراق فى تجاوزها الدماء
سامح عثمان

10 comments:

Shreef said...

:D
ضحكتيني و الله
ايوه يا فندم احنا شعب بيبرطم كتير لاننا فعلا من سلالة بطريموس الاول
هوا كدا احنا اجدع حاجة عندنا البرطمة مش عارف ليه يبدو انا احنا كدا لغاية ما اتحولنا كلنا لبراطيم كبار
:)
عجبني اوي الشعر اللي في الاخر ده
بوست دمه خفيف اوي
تحياتي ليكي
سلام

alexandrany said...

يعيش السلطان بطريموس الاول
طويل العمر
يطول عمره
يزههزه عصره
ينصره على من يعاديه
:)

نبض اسكندرية said...

شريف

نورتنى ياباشا

وحلو قوى تعبير براطيم كبار دى عجبنى قوى

اتمنى دوام المتابعة

خالص تحياتى

نبض اسكندرية said...

الاسكندرانى

هاى هيى

ماشى ياباشا ونورت والله

تحياتى

saso said...

يعني ولا اخد حقي ولا ابرطم كمان
:)

ده طبع فينا ..بس لازم تشهدي علي عصر الديموقراطية
ايام ناصر والسادات كان اللي بيبرطم بيتلفت حواليه ومتوقع ايد تشده ورا الشمس
دلوقت بنبرطم في الشوارع وفي البيت بيتك عادي جدا
الراجل عارف ان الكلام لا بيودي ولا بيجيب + بيفرغ طاقة

يبقي من حقنا نستغل حقنا الدستوري في البرطمة ولا لا
---
واحد سواق ميكرو العسكري وقفه وقاله انزل .السواق كان ولد صغير نزل وهوا بيقول
ولا هيقدر يعمل حاجة

العسكري بهدله بالمعني الحرفي وفتشه -مع انه مش من حقه- ورماله الرخصة ف الشارع وجابها من وسط العربيات بالعافية- في نزلة صلاح سالم والسواقين بيلعبوا رالي- وبعد مارجع بمنتهي السعادة بيقول
شفتوا ولا يقدر يعمل حاجة ولا يقدر ياخد رخصتي
:)
لو مقالش كده كان ممكن يجراله حاجة

سمراء said...

عجبني حاجتين
الاولي هي برة الخدمة بتاعتة ميساويش حاجة
يا تري هو حاسس ان قيمته هي قيمة البدلة ؟ يا تري هو اتعرض لقهر وظلم فمصدق يلبس البدلة علشان ياخد حقة ؟
يا تري هو محترم نفسه ؟


الثانية
اننا فعلا لو بطلنا نبرطم نموت
يمكن في يوم البرطمة تجيب نتيجة
يمكن يكون عيار بيدوش ولسة مصابش

كلامك فتح كثير من التساؤلات
سمراء

Darsh said...

مصيبة للبرطمة تتراقب هي كمان

لأ عادي يعني ما الواحد لازم يطلع اللي جواه

أي إنسان مقهور لازم بيعمل كده

و لو ما عملش كده لهيتجن لهيتجنن مفيش حاجة تالتة

نبض اسكندرية said...

saso

فكرتينى بحتة فى فيلم

لما اضرب قال البنطلون لا...البنطلون اة

نفس الفكرة

اكيد احنا فى احسن عصور الديمقراطية في حين ان حال الشعب اسواء العصور اللى مرت علية كانت دى

زمان بقة كانت اسواء عصور الديمقراطية لكن حال الشعب كان احسن العصور اللى مرت علية

برطمة ببرطمة بقة...

نورتينى يا ساسو

تحياتى

نبض اسكندرية said...

سمراء

بصراحة مش انا اللى فتحت تسأولات يا سمراء لكن انتى اللى فتحتى تسأولات جديدة

فعلا هو اكيد مش محترم البدلة واكيد كمان بيتلذذ باللى بيعملة كمان

لكن ذنب الشعب اية لو كان اخينا دة بيستغل مهنتة

ماذا فعلنا لنجنى ونحصد هؤلاء ؟

التعامل بقة صصعب جدا مع معظم الناس

نورتينى يا جميلة

دمتى بخير وخالص تحياتى\

نبض اسكندرية said...

درش

ربنا يطمنك يا هيتجنن يا هيتجنن

ربنا يستر علينا بقة

نورتنى ياباشا

تحياتى