دكتور مصطفى محمود

الله هو المحبوب وحده على وجه الأصالة وما نحب فى الآخرين إلا تجلياته وأنواره فجمال الوجوه من نوره وحنان القلوب من حنانه فنحن لا نملك من أنفسنا شيئاً إلا بقدر ما يخلع علينا سيدنا ومولانا من أنواره وأسمائه

Friday, February 29, 2008

يعيش أهل بلدى


وبينهم ما فيش
تعارف
يخلي التحالف يعيش
تعيش كل طايفه
من التانيه خايفه
وتنزل ستاير بداير وشيش
لكن فى الموالد
يا شعبي يا خالد
بنتلم صحبه
ونهتف .. يعيش
يعيش أهل بلدي


يعيش المثقف على مقهى ريش
يعيش يعيش يعيش
محفلط مزفلط كتير كلام
عديم الممارسه
عدو الزحام
بكام كلمة فاضيه
وكام اصطلاح
يفبرك حلول المشاكل قوام
يعيش المثقف
يعيش يعيش يعيش
يعيش أهل بلدي



يعيش التنابله
فى حي الزمالك
وحى الزمالك
مسالك مسالك
تحاول تفكر تهوب هنالك
تودر حياتك
بلاش المهالك
لذلك إذا عزت توصف حياتهم
تقول الحياة عندنا
مش كذلك
وممكن تشوفهم فى وسط المدينه
اذا مر جنبك
أتومبيل سفينه
قفاهم عجينه
كروشهم سمينه
جلودهم بتضوي
دماغهم تخينه
سنانهم مبادر تفوت فى الجليد
ما فيش سخن بارد
بياكلوا الحديد
ما دام نهر وارد
وجاي م الصعيد
تزيد الموارد
كروشهم تزيد
وتسمع وتسلم
بأن التنابله
أو الأكالين
حيسمح كبيرهم
ويعمل مقابله
مع الفلاحين
ويحصل تحالف
ما بين الجميع
ونملا المصارف
بدم القطيع



أطيع الخليفه
أطيع والديك
أطيع التنابله
دا مفروض عليك
وتزرع وتبعت لحي الزمالك
وحي الزمالك
مسالك مسالك
تحاول تفكر تهوب هنالك
تودر حياتك بلاش المهالك
لذلك
إذا حد جاب لك سيرتهم
تبسمل تكبر
وتهتف كذلك
يعيش التنابله
يعيش يعيش يعيش
يعيش أهل بلدي




يعيش الغلابه
فى طي النجوع
نهارهم سحابه
وليلهم دموع
سواعد هزيله
لكن فيها حيله
تبدر تخضر جفاف الربوع
مكن شغل كايرو
ما يتعبش دايره
لا ياكل
ولا حتى يقدر يجوع
يا غلبان بلدنا
يا فلاح يا صانع
يا شحم السواقي
يا فحم المصانع
يا منتج
يا مبهج
يا آخر حلاوه
يا هادي
يا راضي
يا عاقل
يا قانع
ما تتعبش عقلك
فى شغل السياسه
وشوف انت شغلك
بهمه وحماسه
وعود عيالك فضيله الرضا
لأن إحنا طبعا
عبيد القضا
ورزقك ورزقي ورزق الكلاب
دا موضوع مؤجل ليوم الحساب
كمان الصحافه
حتكتب فى حالتك
وتنشر مناظر لخالك وخالتك
وتتطلع يا مسعد عليك الغناوي
وتسمع باسمك
فى قلب القهاوي
تحبك مشيره وبنات الجزيره
وقصه غرامك
تشيع فى الرداوي
يعيش عم مسعد
يعيش يعيش يعيش
يعيش أهل بلدي



8 comments:

Diyaa' said...

جميل أوي المكتوب لأنه ببساطة مفيهوش تكلف
تودر حياتك
الكلمة دي الأول افتكرتها خطأ املائي بس لقيتها متكررة وبصراحة مفهمتش


وليا ملحوظة..عارف إن الزمالك أو أهلهم هنا رمز..بس عرفت بعض الناس في ما يصطلح بتسميته المناطق الراقية سواء زمالك أو غيره ..والناس دي بجد بتحس ببلدها أوي وتلاقيهم مستعدين يفدوها بروحهم ومش معني إنهم هناك يبقي محتكر أو حرامي ..غالباً بيبقي ورث وبيبقي ابن ناس من اللي الثروة منستهمش بلدهم

بحييكي أوي علي المكتوب
وشكلك في كلام أجمد من كده ممكن تقوليه بس المشي جنب الحيط بيعلم المواربة
تحياتي :)

alexandrany said...

انا جيت اهوه حسب الميعاد
انا ما اتخرتش اهوه
:)
احساس رائع وجميل
انا ما كنتش فاكر انك عندك موهبه الكتابة بالشكل ده
بجد جميل قوي
..
زمانك بتقولي دلوقتي ايه ده
ده فاكرني انا اللي كاتبه الكلام ده
ههههههههه
صح ولا مش صح
:)
لا بس بجد جميله قوي
نجم ده عليه شويه مفرقعات بيطلعها من مخه
عجبتني قوي الحته بتاعه
ما تتعبش عقلك

فى شغل السياسه

وشوف انت شغلك

بهمه وحماسه

وعود عيالك فضيله الرضا

كلام في توجيهه مباشر لان كل واحد الاول يشوف شغله صح وبهمه وبعدين يلتفت للباقي
بجد شديده
بس انا ليا سؤال؟
ازاي وانتي نبض اسكندريه وما تعرفيش المطواة قرن الغزال شكلها ايه
فضحتونا في المودنات
:)
تحياتي

alexandrany said...

معلش في حاجه نسيت اقولها
بلاش اللون ده تاني عشان نعرف نقرا
اوكي
:)
ولا انتي ناويه بجد على قرن الغزال

نبض اسكندرية said...

ضياء الشمس

فرحانة ان اول كومنت منك طبعا واتمنى دوام المتابعة لمدونتى المتواضعة

عايزة اقولك يا ضياء انى عمرى ما نزلت الزمالك دى خالص لكن دة كان وصف نجم لحى الزمالك ومع ذلك كلنا عارفين ان فى كل مكان فى الدنيا فى القوى والضعيف والغنى والفقير

واكيد فى الزمالك فى اللى بيحب بلدة وبجد يقدر يدافع عنها واكيد فيها الللى غير كدة

وشكلك كدة يا ضياء هاتخلينى ابطل المشى جنب الحيط

تحياتى

نبض اسكندرية said...

الاسكندرانى الشقى

اولا صح اللى قولتة بس انت لحقتنى

هو نجم بجد شعرة فظيع وكلامة مؤثر لدرجة كبيرة

وعمتا شكرا على الكلمتين الحلوين اللى سعادتك قولتهم بس بلاش القرن الغزال

ابقة ابعتلى صورة ليها خلينى اعرفها طالما عييبب فى حقى انى معرفش القرن الغزال

اخيرا بقة معرفش انك شيشي بيش بس ماشى مراعاة لظروفك الشيش بيش مش هكتب تانى باللون

هههههههههههههههههههه

بهزر طبعا اوعى تزعل

تحياتى

Hannoda said...

كلامها حلو قوي لإنه حقيقي .. بكاني علينا و على الفروق الواسعة القاسية اللي بقت بينا

إحنا.. إحنا مننا فينا
جوانا طبيقية و تعالي من ناس على ناس

عارفة
لما تتغربي في مكان مليان شعوب و جنسيات و وشعوب مكفولها حق التعالي
وشعوب مفروض عليها التهزيق و السخرية

ساعتها قلبكك يوجعك أما ترجعي بلدك اللي الكل فيها زيك وشبهم وكلامه هو كلامك
وبرضه تلاقيه التعالي و السخرية و الفروق القاسية

فتحسي ان بلدك كمان بقت شعوب و الغربة مالياها

ده اللي اترسملي من بين السطور و أنا بقرا

الكلام جامد جدا

تحياتي ليكي

نبض اسكندرية said...

هانودا

فعلا احنا فينا الطبيقية وخصوصا فى العرب بس لية احنا شيفنها بالجانب الوحش مش يمكن يكون ليها جانب حسن واحنا مش عارفينة لسة

احنا كلنا عارفين ان كل شى فى الدنيا وجهين المشكلة عندنا اننا اخدنا المبادى ورسخنا عليها عقولنا انا شايفة ان ممكن يكون فعلا ليها جانب فعال واحنا لسة مش عارفينة

بس احساسك صعب قوى فى الغربة يا هانودا عارفة انا عايزة اسافر ونفسى اسافر بس بجد عشان اقابل الجنسيات المختلفة دى

تحياتى أيتها الحالمة الرقيقة

Diyaa' said...

مقلتليش برضه يعني إيه تودر حياتك
مع إني أخدت باللي من إنها من مصطلحات نجم بس بسأل تاني رخامة بقي :))

http://www.maganin.com/files/knife.jpg


ودي صورة قرن الغزال
لحسن تفتكريها فتاحة كانزات :))