دكتور مصطفى محمود

الله هو المحبوب وحده على وجه الأصالة وما نحب فى الآخرين إلا تجلياته وأنواره فجمال الوجوه من نوره وحنان القلوب من حنانه فنحن لا نملك من أنفسنا شيئاً إلا بقدر ما يخلع علينا سيدنا ومولانا من أنواره وأسمائه

Wednesday, October 15, 2008

احوالنا

بسم الله الرحمن الرحيم

كنت راجعة امبارح من الشغل وطبعا مش هاوصف ازاى المواصلات بتكون زى الزفت واحنا راجعين من الشغل

بجد اصعب وقت تركب فية مواصلات هو وقت انصراف الموظفين وغير كدة بقة تلاقى السواقين تتعوج عليك

يركب الصبح على مزاجة والظهر على مزاجة وبالليل على مزاجة ولو متعوجش عليك فى المكان اللى انت رايحة

تلاقية اتعوج عليك فى الاجرة..مثلا

فى وقت الزحمة تلاقى الاجرة بقت الضعف ولو مش عاجبك انزل

بالليل بعد الساعة 12 بتزيد عشان مش عارفة لية؟

ولو مش عاجبك.. انزل يا حبيبى شوفلك حاجة تانية فى غيرك الف عايزين يركبوا ويدفعوا برضوا

وتحس ان الحياة بقت ماشية بالبلطجة ولوى الدراع ومش حاسة ان فى اوضاع بتصحح

المهم خلينى فى اللى كنت عايزة اقولة ..كنت راجعة امبارح من الشغل وبعدين وانا نازلة من المشروع

لقيت واحدة ست حاجة كبيرة وافقة فى نصف السكتين ومافيش ولا عربية عايزة تخلى عندها شوية دم وتقف لغايط ما الحاجة تعدى

لما عديت ووصلت عندها اخدتها وروحت معديها للرصيف التانى ولسة يا جماعة بلف نفسى وبرجع

لقيت سواق عربية نصف نقل قالى :ماتخفى يخربيت..................... اكيد بقة الباقى واضح

طبعا انا كنت فى نصف السكة ومكلمتش واخدت الكلمة وكملت عادى وروحت وركبت المشروع التانى

لما قعدت مع نفسى سألت نفسى هو لية شتمنى؟ يعنى كل دة عشان اوقف خمس ثوانى؟ ولا هو الدم اتعدم من البشر

طب لو كانت الحاجة دى تبقى والدتة هو.. تفتكروا كان شتمنى باردو وانا بعديها

بصراحة اسفى على احوال المصريين فى انحلالهم الاخلاقى المستورد عليهم

اكيد محتاجين اعادة تأهيل

ولو الحكومة وحشة فانا متأكدة انة مننا وبسببنا ومن اعمالنا ومن انفسنا

مثلما تكونوا يولى عليكم

يا جماعة عشان نبتدى نصلح فى المجتمع لازم نبتدى بين الاول لازم نصلح من انفسنا

لايغير الله ما بقوم حتى يغيروا ما بأنفسهم

اللهم اعنا

ملحوظة اخيرة: حملة صناع الحياة الجديدة هاتبدى بس لازم يكونوا 35 الف مشترك

محتاجين شباب كتير يا جماعة عشان نبتدى الحملة يلا الحاضر يعلم الغايب

وهتلاقى استمارة التسجيل على جروب صناع الحياة على الفيس بوك وعلى موقع الدكتور عمرو خالد

اللهم بلغت

تحياتى

10 comments:

http://kasperb4.blogspot.com/ said...

معاكي حق
وكل الحق
اي حاجة وحشة بتحصل فينا احنا سب رئيسي فيها مفيش كلام
وحالنا مش هيتعدل الا لما نعدل نفسنا

حمدلله ع السلامة
:)

Anonymous said...

السلام عليكم

بالنسبة الى ذكرك عبارة
///////////////////
مثلما تكونوا يولى عليكم
////////////////////
على انها حديث - فالحقيقة ان هذه العبارة غير ذلك
يمكنك مراجعة هذا الرابط
http://audio.islamweb.net/audio/index.php?page=FullContent&audioid=19336

فرجاء الغاء عبارة قال رسول الله التى توحى بانها حديث و اعتبارها كأنها حكمة او مثل مع بيان ذلك اى قول كما تقول العبارة الشهيرة كذا ...

انا متأكد طبعا انك اضفتها دون علم بمدى صحتها على اعتبار انها من العبارات الدارجة على السنه الناس .


تحياتى

مؤمن

نبض اسكندرية said...

محمود

الله يسلمك يا محمود

تحياتى

نبض اسكندرية said...

Anonymous

فعلا عندك حق

وبجد الصفحة دى فادتنى كتير

وشكرا لمجهودك

تحياتى

Diyaa' said...

إنما الأمم الأخلاق ما بقيت
وهما خدوا بالهم وخلوا المدارس بتقوم بالتلقين بس ولا تربية ولا حتي تعليم
لو قارنتي بين مستوي مرتبات المدرسين في أي دولة شبه متحضرة وبين عندنا هتعرفي السبب في أحوالنا

ربنا يهدي الجميع .ويجازيكي كل خير..متخليش حاجة زي كده تحبطك

Soooo said...

بصي بقى
الشعب صناعة الحكومه في اي دوله

وانتي عندك حكومة بسم الله ما شاء الله .. من سنة سبعه وسبعين ومن ساعة ما الانفتاح الاقتصادي اتعمل .. ومافيش اي دور للحكومه غير في التكوييش على كل ماتطوله ايدها

ولا فارق معاهم شعب ولا فارق اي حاجه
واوعي تفتكري ان الشعب لو عايز ينظبط هينظبط .. لأننا من جوانا شايفين ان الدنيا بقت غابه
كل اللي يقدر يعمل حاجه يعملها .. وعلى حسب ضهر الواحد واللي واقف وراه

سعيد جدا اني جيت مدونتك وبجد مستمتع وانا باتفسح هنا
فين الشاي والقهوة والحاجه الساقعه؟؟؟؟





سلامووووووووووووووز

نبض اسكندرية said...

ضياء

اخيرا شفتك تانى عندى

نورتنى بجد

وبالنسبة لموضوع التربية فعلا عندك حق

الموضوع دة المدراس بتتاجهلة

شكرا لمرورك الكريم

تحياتى

نبض اسكندرية said...

سو

كلامك كان كتير فية مش غلط

لكن باردو انا مصممة ان كل اللى بيحصل دة مننا احنا

قولى انت لقيت كام واحد بيشكر فى اخلاق الناس وانت تعرف

الاخلاق الوحشة مش الحكومة هيا اللى بتخلقها

انفسنا
احنا

لكن مع كلا انا متأفلة بجيل المدونين

اذا كنا نفعل ما نقول
وليس العكس

طبعا انا مبسوطة اكتر بزيارتك دى

واتمنى دوام المتابعة

واسفة انى مش هاقدر ادخل مدونتك دلوقتى

لكن بجد ان شاء الله ادحل واتابع

دمت بخير خالص تحياتى

Anonymous said...

فعلا المجتمع في حاجة لأصلاح شامل - المسألة تعدت أصلاح الحكم أو الحكومة

بلوجاتي

Ehab said...

موضوع السواقين ده بقى فرسه قوي
منهم اللي بيزود السرعه عليكي علشان يخوفك اللي هو نظام بيعاقبك علشان متعمليهاش وتعدي قدامه تاني
ومنهم اللي بيشتم ويجري
ومنهم اللي يدعي عليكي
ومنهم اللي يلاعبك بالدركسيون ويروح ناحيتك كده قال يعني هيخبطك ويشوف مدى شجاعتك بقى
كل واحد منهم بحال
حاجه بقت قرف والمصيبه ان عدد الناس اللي بتركب عربيات كل يوم بيذيد مفيش بقى يعني ايه سواقه ولا ذوق ولا ادب ولا ايه بتنجان
ربنا يستر انا هحاول اجيب سيخ حديد اخليه في ايدي على طول ولما سواق يشتمني ابوظله ام العربيه بيه واجري انا بقى


سلااااااااااااااااااااام