فى يوم فتحت التليفزيون وشغلت الدش لقيتة فتح على قناة دريم2 وكان برنامج عم يتساءلون شغال فى الوقت دة
وكان مستضيف شيخ اسمة الشيخ صبرى عبد الروؤف على ما اعتقد والله لانى مش دة اللى شد انتباهى
اللى شد انتباهى ساعتها انهم كانوا بيقولوا ان الفنان الشعبى سعد الصغير كاتب كلام فى الجرايد على الشيخ المسير
انة تقاضى فلوس مش عارفة كام كدة من قناة مش محترمة يعنى وبيقول ان الفلوس دى حرام زى ما انتوا حرمتوا فلوس المسجد
طبعا انا قاعدة شايفة ناس عمالة تطحن فى بعض كلام واخيرا بدات افهم واللى فهمتة بقى هو ان الفنان سعد الصغير بنى مسجد
والشيوخ اجمعوا ان المسجد دة من فلوس حرام فا مينفعش حد يدخل يصلى فية
واتصل ساعتها سعد الصغير والقناة عرضت زى برموشن عن الشيوخ اللى قالوا انة حرام وكان منهم الشيخ المسير
والاستاذة سعاد صالح واللة هما دول اللى فاكراهم حتى ذكر الشيخ المسير لوصفة على الموضوع يعنى وعلق وقال
ياريتها ما زانت ولا اتصدقت
والاستاذة سعاد صالح قالت ممكن يكون عاملة من باب الرياء
لكن رد سعد وقال سبب بنى المسجد دة ان اخوة اتوفى واتمنى انة يعمل حاجة لله يعنى وكان بيشوف دايما والدتة بتبكى وهيا فى البلكونة
انا كدة حكيت القصة بالمختصر المفيد
لكن حابة انى اقول رايى
اولا \ انا اعترض على الهجوم اللى اتعرضلة الفنان سعد الصغير من قبل الشيوخ
ثانيا بقى\هو انا مش قادرة احدد ان كان المسجد بناءة حرام ولا حلال لكن لية الناس متدخلش تصلى فية
اية السبب اللى يمنع ان الناس تدخل المسجد دة ويتصلى فية زى باقى المساجد ولية الشيوخ على ما اظن حرموا دخول اى فرد يصلى فى
المسجد دة
وبعدين لية ظنوا فية الرياء وماظنوش فية خير اكتر من كدة
مش يمكن لما يدخل يصلى فى المسجد الشباب اللى وراة فى الرقص بتاعة دة تبقى وراة باردو فى الصلاة
مش يمكن يكون سبب لتوبتة او توبة شخص تانى
انا فاكرة ان مرة فى عهد الرسول صلى الله علية وسلم المنافقين وكان معروف عنهم فى وسط الصحابة انهم منافقين بنوا مسجد ودعوا
الرسول صلى الله علية وسلم للصلاة فى المسجد دة
فا ربنا جل وعلا نزل الاية دى\
بسم اللة الرحمن الرحيم
قال الله تعالى: (لمسجدٌ أسس على التقوى من أول يوم أحق أن تقوم فيه. فيه رجال يحبون أن يتطهروا والله يحب المطهرين)
صدق الله العظيم
والاية دى من سورة التوبة
بس المنافقين دول معروف عنهم انهم منافقين لذلك نهى الله رسولة الكريم عن الصلاة فى المسجد دة
اظن المسلمين من خسرانين شى لو كان يقصد بالمسجد دة خير
لو كان يقصد بالمسجد دة رياء زى ما بيقولوا
ربنا يعفو عنه وعنهم اجمعين
17 comments:
والله في قنوات وبرامج من استفزازها تكره الواحد في الفرجه ع التلفزيون
ربنا يرحمنا
تحياتي
شادى
والله انا بحترم البرنامج دة كتير وبطرح القضية دى انا كدة مش بعيب فى القناة لكن الناس اللى طلعوا وقالوا حرام
كلمة حرام فى زمانا بقت تتقال ولا 50 مرة فى اليوم
ربنا يرحمنا
ولك منى ايضا
خالص تحياتى
والله يا بنتي انا بطلت اسمع للشيوخ دول
حسبي الله ونعم الوكيل
في شيوخ اصلا تدوخك
وتخليكي تكرهي الدنيا وبما فيها
وتحسي ان كل شئ بتعمليه حرام في حرام
يا جماعه الدين يسر مش عسر
وربنا يهدي الجميع
وبعدين ما ممكن واحد بلحية وزبيبة الصلاة في اااااااد كدة ويبني مسجد ولا قصد بيه غير التستر علي اعماله القذرة او سرقاته
الله اعلم بالنيات
والله اعلم بكل سر
ربنا يهدينا جميعا يارب
سمراء
عندك حق والله وحلوة قوى حتة الزبيبة دى
دمك عسل قوى والله يا انجى
وميرسى يا حياتى وربنا ما يحرمنى من زيارتك
تحياتى
الموضوع دا بقى اهم حاجة فية ان سعد الصغير بيتباهى بالجامع والشيوخ بيقولوا حرام يعنى الاتنين خدوا ذنوب ع الفاضى
Thanks for you work and have a good weekend
الموضوع يغيظ في كل حاجة فية
اولا من اسلوب معالجتهم للموضوع
ومن اسلوب تحريم الشيوخ
ثانيا واحد مسلم بني جامع لله
اعتقد انة مبيبقاش بتاعة خلاص بقي بيت من بيوت الله وتابع للاوقاف ولو مش متاكدين من حرمانية فلوسة يبقي خلاص
ولو متاكدين من حرمانية فلوسة المفروض كدولة مسلمة منسمحش بشيوع الحرام كدة
ثانيا لو دخلنا في موضوع ان واحد فلوسة حرام بيبني مسجد يبقي المفروض منصليش فية يبقي حنرجع تاني للسؤال الابدي ان الحكومة فلوسها حلال ولا حرام واللي بتعملة يعملة مسلمين ولا حركاتها حركات ناس مش مؤمنة وبالتالي جوامعها حتبقي حرام نصلي فيها
نفسي مصر تحدد هي مسلمة ولا علمانية ؟
M.F.A
بصي المنطقة دي ملغومة ومش مهمة أوي لكن بما إنك دخلتيها فأنا هقول رأيي ..
واحد كل يوم في كباريه شكل وبيغني لخمورجية وستات لابسة من غير هدوم وبعدين يقول أنا عملت المسجد ده عشان أتقرب من ربنا ..ويتباهي بكده في الجرايد ..فأنا لما أروح للمسجد ده هروح عشان أأدي صلاتي لربنا لأن المسجد ده أقرب حاجة ومستعجل مثلاً ..
ومدعيش لصاحب المسجد إلا بالهداية
لكن مش هدعيله إن ربنا يجازيه خير مثلاً لأنه مش واضح هو إيه الخير اللي ناوي عليه أصلاً من بناء المسجد
أدعيله ربنا يهديه ومتكلمش عن المسجد بحاجة في حق اللي بناه لو لقيت حد بيصلي فيه ..لأن المسجد أول ما اتبني بقي بتاع ربنا
وبعدين أصلاً من المستحب إن الواحد يروح للمسجد الأبعد شوية لأن كل خطوة ليه بترفع حسنة وتمسح سيئة والله أعلم لأني مش فاكر نص الحديث
سعد كإنسان محترموش وهو زيه زي فيفي عبده في نظري ولو جسمه فيه اغراء ويجيب فلوس معتقدش إنه هيتردد لما يطلبوا منه يلبس من غير هدوم لكن المسجد الصلاة فيه بس تبقي للدعاء بالهداية ليه ولأن مفيش مسجد أقرب ..غير كده مينفعش كل واحد يبني مسجد أقول عليه ولي من أولياء الله الصالحين خصوصاً إن الصلاة بالنسبة للناس بقت أداء بس مبقتش حاجة من القلب ..ومش منطقي يكون هو بيعمل حفلاته في كباريهات وعايز الناس تقرب من ربنا بعدها بأداء الصلاة طيب لو هما صلوا بجد وزي ما رسولنا كان بيصلي وزي ما الصلاة اتشرعت فعلاً هل هيبقي في حد ليه نفس يجيب شريط بيقول العنب العنب العنب ؟ ولا يروح كباريه ينقط سعد وهو بيرقص ولا الرقاصة والفرقة
الموضوع مش مستاهل لكن سعد ربنا يهديه ومينفعش نقول حرام الصلاة في المسجد ده ..مفيش بشري من حقه يقول كده أصلا
وعذراً للإطالة
لن اتحدث عن حرام او حلال تلك القضيه
ولن البرنامج ده ومذيعه المستفز دائما ما يقود المشايخ بعضها البعض الي حرب بارده
المهم اغتقد ان عدم احترامنا للاخرين هو ما جعل منا عد تقبل الراي والراسي الاخر علي جميع الاصعده
احمد
ميرسى لمرورك
تحياتى
david santos
thank you
moh
اكيد انت طرحت القضية بشكل تانى وكمان طرحت كام سؤال كويسين
لكن مسألة ان مصر مسلمة ولا علمانية
فى نظرى ان لسة مسلمة والحمد لله
مدام لسة فيها الناس اللى بتشهد بوحدانية الله
تحياتى
ضياء
طبعا واكيد نورتنى
عايزة اقولك انك لخصت الموضوع
يبقى اظن مش من حق الشيوخ يحرموا دخول المسجد دة لانة بفلوس حرام
وانا مش من حقى اسال على مصدر الفلوس دى
انا داخلة اقضى عبادة وماليش دعوة غير بربنا
تحياتى ليك
محمد مفيد
نورتنى يا ابو عبدالله
وردك صح والله
تحياتى
ساسو
وعليكم السلام ورحمة الله وبركاتة
ميرسى يا جميل
وهروح مدونتك اهو
تحياتى
أنا برضه استغربت جدا من منع دخول الناس للمسجد
بالنسبة لنية سعد الصغير.. رغم وضوحها لكن ما فيش حد فينا مخول له انه يحكم على نوايا الناس
والله الحكاية بسيطة جدا
واحد عمل عمل خير .. و العمل اضطلع عليه ربنا
لز منافق حسابه عند ربنا وحده
ولو مخلص ثوابه عند ربنا.. يعني محدش فينا محتاج يعرف ان كان مخلص ولا لأ
أما عن صلاه الناس فيه فلو المفروض ان ماحدش يصلي فيه عشان صاحبه بناه بغرض النفاق
يبقى بمنطق الرأي ده المفروض ان كل واحد فينا يسأل عن أي مسجد رايح يصلي فيه و يعرف مين بناه و ليه
لإن فيه مساجد كتير اتبنت لأغراض غير وجه الله
لكن بنصلي فيها
على فكرة وحستني بوستاتك قوي
هانودا
عظمة على عظمة يا جميلة
بجد انتى اللى وحشتينى
واسفة انى مدخلتش عندك بقالى فترة
ميرسى لردك ومرورك يا جميل
تحياتى
Post a Comment