تنبية هام.....
البوست دة اظن انة غير مفهوم وبوست حزن فا اللى مش عايز يوجع دماغة ميقراش البوست دة وشكرا للزيارة طبعا
لية؟
لية الطبيعى فى زمانا.. مبقاش طبيعى
ولية اللى مش طبيعى فى زمانا.. بقى طبيعى
والغريب
ان اللى مش طبيعى فى زماننا بقينا نقول علية طبيعى واللى طبيعى بقينا نقول علية هو دة اللى مش طبيعى
والله انا حاسة ان كلمة طبيعى تعبتلى من كتر ما بقيت اقولها
لية زمان كان بجد زمان ونتمنى اننا كنا نعيش زمان ولو كنا عشنا زمان ياترى كنا هنرضى بية ولا هنكون زى حالنا دلوقتى
نقول ان زمان زمان كان احسن من زمان
الامام الشافعى بيقول
نعيب زماننا والعيب فينا ومال لزماننا عيبا سوانا
يعنى هو فعلا الغلط فينا
هو راحت فين القيم والمبادى؟؟؟؟؟؟؟؟؟؟؟؟؟
هو الناس عارفة تتأقلم مع الجو دلوقتى
يعنى قادرين تعيشوا من غير قيم ومبادى
انا مش عارفة اقول غير انى بجد نفسى اشوف انسان فرحان فى الزمن دة
نفسى يجى يووم القيامة قوى نفسى اشوف الناس اللى ظلموا دول هيكونوا ازاى؟؟؟
نفسى نبطل غنى عن الحب والحزن ؟؟؟؟ وكأن مافيش غيرهم فى حياتنا..... كأن هما دول المشكلة الرئيسية فى حياتنا
نفسى نبطل نقول هو النمص حلال ولا حرام هو البنطلون الواسع حرام ولا حلال
نفسى القوى يرحم الضعيف لكونة القوى
عمنا جاهين زمان قال: حاجة بجد حلوة بس ياريتنا نعرف نعملها
صبرك ويأسك بين ايديك وأنت حر
تيأس ما تيأس الحياة راح تمر
انا دقت من دا ومن دا
عجبى لقيت الصبر مر وباردوا اليأس مر
وقال كمان
حاسب من الاحزان وحاسب لها
حاسب على رقابيك من حبلها
راح تنتهى ولابد يوم راح تنتهى
مش انتهت احزان من قبلها
كنت قاعدة اقرى فى يوم اجندة مذكراتى
الاجندة دى مش فيها اية اللى بيحصلى كل يوم لكن بكتب فيها اشياء بتؤثر فى شخصيتى وفى تكوينها
ومن ضمنها كنت قريت كتاب علم نفس ولقيت فية تعريف الشخصية
اللى يهمنى فى تعريفها هو لا يوجد انسان معدوم الشخصية
والغريب ان كلمة شخصية مصدرها لاتينى معناها القناع فقد كان بعض الممثلين على المسرح الاغريقى يلبسون أقنعة تخفى عيوبهم الخلقية
فهل معنى ذلك ان الشخصية هى القناع الخارجى الذى نلبسة لنخفى الحقيقة الداخلية؟؟؟؟
السؤال اللى عايزة اسالة
لما بنقابل الناس الكدابين والغشاشين والظالمين والحاقدين بيكونوا عارفين انهم لابسين القناع دة؟
ولو كانوا عارفين ازاى بيصنعوا القناع دة؟
وياترى دة كمان بقة من الطبيعى اللى بقينا طبيعى اننا نشوفوة
انا اسفة لكل انسان هايقرى البوست دة بس انا فى حالة انكسار وانقسام وعقبات صعبة قوى وتغير فى شخصيتى
اعذرونى على البوست الرخم دة
